IIDMB: 4 jylda 4,9 trln teńgeniń jobasy iske qosyldy

NUR-SULTAN. QazAqparat - Indýstrııalandyrýdyń ekinshi besjyldyǵy aıasynda 44 myń jańa turaqty jumys orny quryldy. Bul týraly búgin Úkimet otyrysynda QR 2015-2019 jyldarǵa arnalǵan ındýstrıaldy-ınnovatsııalyq damý memlekettik baǵdarlamasynyń oryndalý barysy jaıynda baıandaǵan QR Indýstrııa jáne ınfraqurylymdyq damý mınıstri Roman Sklıar aıtty, dep habarlaıdy QazAqparat tilshisi.

«2015 jyldan beri elimizde ındýstrııalandyrýdyń ekinshi besjyldyǵy iske asyrylýda. Bıyl besjyldyqtyń sońǵy jyly. Joba iske asyrylǵan 4 jylda jalpy somasy shamamen 4,9 trln teńge bolatyn 480 joba iske qosylyp, 44 myńnan astam turaqty jumys orny quryldy», - dedi mınıstr.

Osy rette ol taý-ken metallýrgııa kesheni, hımııa, farmatsevtıka, jeńil jáne azyq-túlik ónerkásibi, mashına jasaý, qurylys ındýstrııasy, energetıka, munaı óńdeý, agroónerkásip kesheni jáne aýyl sharýashylyq ónimderin óńdeý salalarynda jobalar iske asyrylǵanyn aıtty.

«Esepti kezeńde jalpy ishki ónimdegi óńdeý ónerkásibiniń úlesi 10,1-den 11,6 paıyzǵa deıin, saladaǵy jumyspen qamtylǵandar úlesi 6,6-dan 6,9 paıyzǵa deıin ósti. Esepti kezeńde baǵdarlamanyń barlyq maqsatty ındıkatorlary boıynsha oń nátıjege qol jetkizildi. 2018 jylǵy qorytyndy boıynsha ónerkásip 4,1 paıyzǵa ósti. Bul óńdeý ónerkásibiniń 4 paıyzǵa qarqyndy ósýi esebinen iske asyrylyp otyr. Ósimniń negizgi draıverleri mashına jasaý, hımııalyq ónerkásip, munaı óńdeý, jeńil ónerkásip jáne metallýrgııa salalary», - dedi ol.

Onyń dereginshe, óńirler arasynda óńdeý ónerkásibi ósimin qamtamasyz etý boıynsha Mańǵystaý, Shyǵys Qazaqstan, Batys Qazaqstan, Aqtóbe oblystary, jáne Nur-Sultan qalasy kósh basynda keledi. 2018 jyly Indýstrıaldaý kartasynyń jalpy somasy 1,3 trln teńgege jýyqtaıtyn 102 joba iske qosylyp, 13,3 myńǵa jýyq turaqty jumys orny quryldy.