IIDM: Arnaıy ekonomıkalyq aımaqtardy damytý máselesi talqylandy

NUR-SULTAN. QazAqparat - QR Indýstrııa jáne ınfraqurylymdyq damý mınıstri Beıbit Atamqulov arnaıy ekonomıkalyq aımaqtardyń (AEA) qyzmetine monıtorıng júrgizdi. Ásirese, elimizdegi iri AEA-ǵa, onyń ishinde «Aqtaý teńiz porty», «Ońtústik», «Qorǵas» ShYHO«, «Qorǵas - Shyǵys qaqpasy» jáne «UIMT» erekshe mán berildi, dep habarlaıdy QazAqparat.

QR Prezıdenti Qasym-Jomart Toqaevtyń Úkimettiń keńeıtilgen otyrysynda bergen tapsyrmalaryn oryndaý aıasynda búgin QR IIDM-de arnaıy ekonomıkalyq aımaqtardy damytý máseleleri qaraldy. Jıynǵa ortalyq memlekettik jáne jergilikti atqarýshy organdardyń ókilderi, AEA basqarýshy kompanııalarynyń, ınstıtýttar men salalyq uıymdardyń birinshi basshylary qatysty.

Jıyn barysynda jer resýrstaryn tıimdi iske jaratý, ınfraqurylymdy damytý, kadrlyq jáne ınvestıtsııalyq áleýetti paıdalaný, sondaı-aq shyǵarylatyn ónimderdiń eksportyn damytý máseleleri qaraldy.

2002 jyldan bastap qazaqstandyq AEA-da 15 000-nan astam turaqty jumys oryndaryn qura otyryp, jalpy quny 1 trln teńge bolatyn 292 joba iske qosyldy. Ónim óndirý kólemi 3,8 trln teńgeni qurady, onyń 282,8 mlrd teńgesi – eksport (7,5%). Salyq tólemderiniń somasy 216,3 mlrd teńgeni qurady.

Mysaly, «Ońtústik» AEA aýmaǵynda shaǵyn jáne orta bıznes kásiporyndary shoǵyrlanǵan toqyma klasteri quryldy. Al, «Astana-jańa qala» AEA-da temir jol mashına jasaý klasteri negizin qalady. Munaı-hımııa klasteriniń negizi «UIMT» AEA-da damýda, sondaı-aq «Aqtaý teńiz porty»AEA aýmaǵynda týrızm salasy órkendeýde.

Búginde 178 joba iske asyrylý ústinde. Olardyń jalpy quny 8,3 trln teńgeni qurasa, 15 myń jumys ornyn qurý qarastyrylǵan.

Óz kezeginde kezdesýge qatysýshylar AEA jumysynyń tıimdiligin atap ótti. Aımaqtardyń ınfraqurylymyna salynǵan 1 bıýdjettik teńgege 3,9 teńge ınvestıtsııa tartylady.

Anyqtama úshin:

Qazirgi ýaqytta Qazaqstanda 13 AEA qurylyp, jumys isteýde. Olardyń qyzmetin baqylaýdy 12 basqarýshy kompanııa júzege asyrady. Barlyq AEA-nyń jalpy aýdany 20 000 gektardan asady.