II Halyqaralyq balet ártisteriniń konkýrsy bastaldy
ASTANA. Jeltoqsannyń 1-i. QazAqparat /Jasulan Amanbaıuly/ - Búgin Astanadaǵy Beıbitshilik jáne kelisim saraıynda II Halyqaralyq balet ártisteriniń konkýrsy shymyldyǵyn ashty,
dep habarlaıdy QazAqparat.
QR Mádenıet jáne aqparat mınıstrliginiń uıymdastyrýymen ótkizilgeli jatqan baıqaýǵa Qytaı, Reseı, Ýkraına, Qyrǵyzstan, Ózbekstan jáne Qazaqstannyń balet óneriniń talantty jastary qatysady.
Konkýrs Qazaqstandaǵy klassıkalyq ónerdi dáripteý jáne otandyq horeografııany álemdik úzdik oryndaýshylyq dástúrlerimen baıytý, sondaı-aq shyǵarmashylyq baılanystardy keńeıtý maqsatynda ótken jyly bastaý alǵan.
Konkýrsqa KSRO-nyń halyq ártisi, Memlekettik syılyqtyń laýreaty Lıýdmıla Semenıaka, Rım bı akademııasynyń rektory Margarıta Parılla, Beıjiń bı akademııasynyń professory Sıao Sý Hýa, japondyq «Toıota-Sıtı-Balet» horeografııalyq kolledjiniń bas dırektory Sýva Hıtoshı, Halyqaralyq balet konkýrstary federatsııasynyń tóraǵasy Sergeı Ýsanov jáne QR eńbek sińirgen óner qaıratkeri Tursynbek Nurqalıev qazylyq jasaıdy.
«Konkýrs jaıyndaǵy alǵashqy áser óte jaqsy. Keshe biz jergilikti balet bıshileriniń daıyndyǵyn kórip, shyn máninde olardyń ónerine qatty súısindik. Italııada jalǵyz balet mektebi sanalatyn Rım bı akademııasy men Astana arasyndaǵy áriptestiktiń ornaýyna yqpal jasaıtyn alǵashqy qadam osy bolsyn», dedi Rım bı akademııasynyń rektory Margarıta Parılla.
ІІ Halyqaralyq balet ártisteri konkýrsynyń negizgi kezeńderi jeltoqsannyń 2-si men 4-i aralyǵynda ótip, saltanatty jabylýy jáne konkýrs laýreattarynyń gala-kontserti jeltoqsannyń 5-inde ótedi.
