IHH túrik qory: Sýdan qurylymdyq gýmanıtarlyq kúıreýdiń aldynda tur
ASTANA. KAZINFORM — «Adam quqyqtary men bostandyqtary» gýmanıtarlyq kómek qorynda Sýdanda jumys isteýdiń operatsııalyq qıyndyqtary týraly aıtyldy. Elde halyqtyń 74%-y tabyssyz qalǵan, dep habarlaıdy Anadoly.
ІHH túrik qorynyń habarlaýynsha, Sýdanda gýmanıtarlyq jaǵdaı ýaqyt ótken saıyn tereńdep, «qurylymdyq kollaps» deńgeıine jetken. Ekonomıka quldyrap, halyqtyń 74%-y tabyssyz qalǵan, al azyq-túlik baǵasy kúrt ósken.
Qor ókilderi atap ótkendeı, balalar men áıelder eń osal topqa jatady: balalar qaraýsyz qalsa, áıelder sý men azyq-túlik alý úshin qaýipti jaǵdaılarǵa tap bolady. Sonymen qatar, ІHH qyzmetkerleri gýmanıtarlyq kómekti jetkizý kezinde kóptegen kedergilerge kezdesedi. Máselen, joldyń nasharlyǵy, janarmaı baǵasynyń qymbattyǵy, ákimshilik rásimder, ınternet pen baılanysqa shekteý, klımattyq qaýipter jáne halyqtyń jıi kóshýi.
Qor 25 mıllıonnan astam adamnyń ómir súrýi úshin gýmanıtarlyq kómekke muqtaj ekenin habarlady. Olar osyǵan deıin 4,5 mıllıon adamǵa azyq-túlik, gıgıenalyq zattar, dári-dármek jáne qarjylaı kómek jetkizgen.
2023 jyly 15 sáýirden bastap Hartýmde bastalǵan qarýly qaqtyǵys búkil elge taralyp, Sýdandaǵy daǵdarysty álemdegi eń iri jáne tez damyp kele jatqan gýmanıtarlyq krızıske aınaldyrǵan. BUU málimetinshe, azyq-túlik tapshylyǵy men zorlyq-zombylyq balalardyń ómirine qaýip tóndirip, mıllıondaǵan adamdar úılerin tastap ketýge májbúr bolǵan.
BUU ókilderi tez arada zorlyq-zombylyqty toqtatyp, eń osal qaýymdastyqtarǵa qol jetkizýdi qamtamasyz etý jáne gýmanıtarlyq kómekke qarjy bólýge shaqyrady.
Aıta keteıik, elden bezgen Sýdan bosqyndary Marokkoda da tyǵyryqqa tirelip otyr.
