IH Halyqaralyq Jáýtikov olımpıadasynda 1-2 oryn alǵan oqýshylarǵa Nazarbaev ýnıversıtetiniń granty tabys etildi
ALMATY. 19 qańtar. QazAqparat - Nazarbaev ýnıversıtetinde bilim alý men úshin úlken mártebe. Bul týraly keshe Almatyda márege jetken IH Halyqaralyq Jáýtikov olımpıadasynda matematıkadan birinshi oryn alǵan Álibek Saılanbaev jeńimpazdardy marapattaý kezinde aıtty.
«Men Almatydaǵy O.Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternatynda 11-shi synypta oqımyn. Buǵan deıin Máskeýdegi tehnıkalyq joǵary oryndarynyń birinde mamandyq alýdy armandaıtynmyn. Búgin men úshin kútpegen syı jasaldy. Jeńimpaz retinde Astanadaǵy Nazarbaev ýnıversıtetiniń grantyna ıe boldym», - deıdi Á. Saılanbaev. Almatydaǵy dástúrli bul bilim jarysynda 2012 jyly da úzdik shyqqan ol, aldaǵy jyldary stýdentter arasynda da óz baǵyn synaýdan úmitti. Jáýtikov olımpıadasynda 2011 jyldan beri qatysyp kele jatqan ol, alǵashqy jyly úzdikter qataryna iline almaǵan edi. Daıyndyqtyń arqasynda endi óz bilimimen ózge eldiń ókilderine qazaq elin tanytqanyna qýanyshy sheksiz.
13 elden kelgen 348 oqýshy bıyl matematıka, fızıka jáne ınformatıka pánderi boıynsha 32 altyn, 57 kúmis, 79 qola júldeni ózara sarapqa salǵan bolatyn. Olardyń arasynan altyn jáne kúmis medal alǵan 89 oqýshy endi aldaǵy jyldary Astanadaǵy Nazarbaev ýnıversıtetinde joǵary bilim ala alady. Onyń 52-si - qazaqstandyqtar.
