Igor Rogov: Qazaqstannyń Ata Zańy - halyq pen onyń Kóshbasshysynyń birlesken týyndysy

ASTANA. QazAqparat - Qazaqstannyń negizgi zańy - halyq pen Elbasynyń birlesken týyndysy. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Konstıtýtsııalyq keńesiniń tóraǵasy Igor Rogov málim etti.

«Ata Zańdy qabyldaý úderisinde Memleket basshysynyń kórnekti róli týraly eske salyp ótkim keledi. Álemde qolyna qalam ustap, zań jobasynyń árbir mátinine zer salyp, qarap shyqqan saıasatkerler men memleket basshylary kóp kezdespeıtini anyq. Atap aıtqanda, Prezıdent osynyń aldynda ózge elderdiń Konstıtýtsııalarynyń birqataryn zerttep shyqqan bolatyn. Olardyń sany birneshe ondaǵan edi»,-dedi I. Rogov.

Onyń sózine qaraǵanda, qazaqstandyq erekshelik retinde osyndaı biregeı qujattyń jasalýyn atap ótýge bolady. Ata Zańda quqyqtyq ǵylymnyń jańa jetistikterine, elimizdiń barsha ulttyq erekshelikterine basa mán berý jaǵy eskerildi.

«Qazaqstannyń Ata Zańy - halyq pen onyń Kóshbasshysynyń birlesken týyndysy dep abyroımen aıta alamyz»,-dedi Konstıtýtsııalyq keńestiń tóraǵasy.

Munymen qosa ol osy aptada ótetin Halyqaralyq konferentsııaǵa toqtaldy.

«28 tamyzda Qazaqstanda Ata Zań kúni qarsańynda dástúrli túrde Halyqaralyq konferentsııa ótedi. Konstıtýtsııalyq quqyq máselelerine arnalǵan bul forým elimizdiń brendine aınaldy. Sebebi sheteldik áriptesterimmen, zańgerlermen, halyqaralyq uıymdar ókilderimen kezdesý kezinde bizdiń konferentsııa jaıynda jıi sóz qozǵaıdy. Atap aıtqanda, sheteldik áriptester jyl saıyn ótkiziletin bizdiń konferentsııa konstıtýtsııalyq quqyq máselelerine arnalǵan biregeı alań ekenin alǵa tartýda»,-dedi I. Rogov.

Onyń aıtýynsha, konferentsııa barysynda kóptegen ózekti máseleler qozǵalatyn bolady. Sharaǵa 28 eldiń ókilderi keledi dep kútilýde.