Igor Nanaevtyń isi boıynsha 56 adamnan jaýap alyndy
PETROPAVL. QazAqparat - Aımaqtyq Ortalyq kommýnıkatsııalar qyzmetinde basketbolshy Igor Nanaevtyń aýyr soqqyǵa jyǵylý isi boıynsha oblys prokýrorlary men polıtsııa brıfıng ótkizdi, dep habarlady QazAqparat tilshisi.
Brıfıngti SQO ákiminiń orynbasary Anarhan Dúısenova bastady.
«Bastapqy protsessýaldy is-sharalar kesheni men isti jan-jaqty saraptaý arqyly 3 qazan kúni «Park-Sıtı» oıyn-saýyq kesheni mańynda eki adam tóbeleskenin, onda Igor Nanaevtyń dene jaraqatyn alǵanyn bildik. 21 jastaǵy kúdikti ustaldy jáne ýaqytsha ustaý abaqtysyna qamaldy. Oǵan qatysty «tutqynǵa alý» sharasy qoldanyldy».
Beınebaqylaý kameralaryndaǵy jazbalar men kýágerler túsiniktemesi saraptalyp jábirlenýshi men kúdiktiniń ǵana tóbeleske qatysqany anyqtalǵanyn taǵy da atap ótkimiz keledi. Ekeýdiń tóbelesi kezinde soqqy jasaǵan basqa adam bolmaǵan. Іs boıynsha birqatar saraptamalar taǵaıyndaldy. Qabyldanǵan protsessýaldyq sheshimderdiń zańdylyǵy men negizdiligin qala jáne oblys prokýratýrasy baqylaıdy», - dedi Soltústik Qazaqstan oblysy ishki ister departamenti bastyǵynyń orynbasary Eńbek Sembın.
Osy is boıynsha 56 adamnan jaýap alyndy. Petropavl qalasynyń prokýrory, aǵa ádilet keńesshisi Aleksandr Trıkachev tóbeles kezinde túngi klýb mańynda bolýy múmkin tulǵalardy anyqtaý úshin barlyq shara qoldanylyp jatqanyn aıtty.
Eńbek Sembın tóbelestiń qyz úshin bolǵanyn aıtty. Soqqyǵa jyqqan kúdikti - jumyssyz, stýdent emes jáne buryn sottalmaǵan. Sot ony eki aıǵa qamaýǵa sanktsııalady.
Qylmystyq bap 2-bólimnen 3-bólimge «Ólimge ákep soqqan aýyr dene jaraqatyn keltirý» babyna aýysty. Suraqtarǵa jaýap bere otyryp, Sembın oqıǵa ornyna eshkim polıtsııa shaqyrmaǵanyn atap ótti. Bul ýaqytta park mańyndaǵy statsıonarlyq bekette kezekshilikte turǵan polıtsııa Qazaqstan Konstıtýtsııasy kóshesin patrýldep júrgen.
Aıta keteıik, jergilikti «Barys» klýbynyń sportshysy qazannyń 2-nen 3-ine qaraǵan túni túngi klýbta bolǵan tóbeles kezinde aýyr jaraqattar alǵan. Jansaqtaý bólimine alyp kelgende onyń bas súıegi men ishki múshelerine qatty zaqym kelgendigi anyqtaldy. 10 qazan kúni sportshy esin jımastan qaıtys boldy.
