Igor Nanaev isi boıynsha aıypkerlerge úkim shyǵaryldy
ASTANA. QazAqparat - Petropavl qalalyq soty basketbolshy Igor Nanaevtyń ólimine qatysty is boıynsha úkim shyǵardy, dep habarlaıdy QazAqparat.
«Sotpen D.Qoıbaǵarovtyń, B.Maqatovtyń, J.Áskerovtiń, A.Meńdibaevtyń, O,Elamannyń QR QK 393 baby 2 tarmaǵynda (Buzaqylyq, ıaǵnı qoǵamdyq tártipti qoǵamdy qurmettemeý anyq kórinetin, azamattarǵa kúsh qoldanýmen ne ony qoldaný qaterin tóndirý) jáne QR QK 106 baby 3 tarmaǵynda (jábirlenýshiniń ólimine ákep soqqan ne qylmystyq top jasaǵan is-áreketter) kózdelgen birqatar qylmysty jasaǵandyǵy anyqtaldy», - delingen sot úkiminde.
Sottalýshy Qoıbarov sotta QR QK 106 baby 3 tarmaǵy boıynsha kináli ekendigin moıyndap, qylmystyq toppen jasamaǵandyǵyn aıtty. Sottalýshy Maqatov pen pen Elaman QR QK 293 baby 2 tarmaǵy jáne 1,2 tarmaqshasy, 106 baby 3 tarmaǵy boıynsha kinálaryn moıyndaǵan joq. Sottalýshy Meńdibaev pen Áskerov ózderine taǵylǵan aıyptardy moıyndamady.
Petropavl qalalyq sotynyń úkimimen Dımash Qoıbarov QR QK 293 baby 2 tarmaǵy 1 tarmaqshasy, 106 baby 3 tarmaǵy boıynsha kináli dep tanylyp, 9 jylǵa jalpy rejimdegi túzeý kolonııasyna bas bostandyǵynan aıyryldy. Baýyrjan Maqatov QR QK 106 baby 3 tarmaǵy boıynsha kináli dep tanyldy. Oǵan jalpy rejimdegi túzeý kolonııasynda jazasyn óteý úshin 8 jylǵa bas bostandyǵynan aıyrý jazasy belgilendi. Aıyptalýshy Maqatov zardap shegýshi Anatolıı Makedonovpen tatýlasty. Janbatyr Áskerov, Ádil Meńdibaev jáne Oljas Elamanovtar da 8 jyl jalpy rejimdegi kolonııada jazalaryn óteıtin bolady.
Zardap shegýshi taraptyń múliktik jáne moraldyq talaptary jartylaı qanaǵattandyryldy. Qoıbaǵarovtan, Maqatovtan, Meńdibaevtan, Áskerovten jáne Elamanovtan zardap shegýshi Bogdan Granetskııge materıaldyq shyǵyn retinde 1,3 mln., moraldyq zalal retinde 2 mln. teńge óndirilip alynady.
Qoıbaǵarovtan, Maqatovtan, Meńdibaevtan, Áskerovten jáne Elamanovtan zardap shegýshi Anatolıı Antropovqa materıaldyq shyǵyn retinde 1125 myń teńge, moraldyq zalal retinde 50 myń teńge óndiriledi. Úkim zańdy kúshine engen joq.
Sottalýshlardyń barlyǵy da Soltústik Qazaqstan oblysynyń 21-23 jastaǵy turǵyndary.
Aıta keteıik, basketbolshy Igor Nanaev 10 qazan kúni Petropavldaǵy oblystyq aýrýhanada jan tapsyrdy. Jergilikti «Barys» klýbynyń múshesi qazannyń 2-sinen 3-ine qaraǵan túni túngi klýbta bolǵan tóbeles kezinde aýyr jaraqattar alǵan bolatyn. Sportshy ólimine baılanysty júzdegen adamnan jaýap alyndy.
