Igor Lepeha turǵyn úı qaptamasynyń qulaýy jóninde: kináliler anyqtalady

ASTANA. KAZINFORM — QR Іshki ister mınıstriniń orynbasary Igor Lepeha elordada turǵyn úı kesheniniń qasbetindegi kirpish qaptamasynyń qulaýy oqıǵasyn tergeý boıynsha pikir aıtty. 

— Barlyǵyna zańnama turǵysynda baǵa beriledi, ıaǵnı qurylysty salǵandar da, turǵyn úı keshenin paıdalaný máselesi de qamtylady. Bul rette qaýipsizdik talaptaryna qatysty qyzmetterdi kórsetpeý, sondaı-aq qurylys deregi boıynsha qarastyramyz. Іs qozǵaldy, kináliler anyqtalady. Qazir tergeý júrip jatyr, — dedi Igor Lepeha Parlament Májilisinde tilshiler suraǵyna jaýap bere otyryp.

Eske sala keteıik, buǵan deıin Astananyń Almaty aýdanynda, Táýelsizdik dańǵyly, 24B mekenjaıynda toǵyz qabatty turǵyn úıdiń qasbetinen kirpishten jasalǵan syrtqy qaptama men kondıtsıoner qondyrǵysy qulap, bes adam zardap shekkenin jazǵan bolatynbyz. 

Keıin ǵımarat opyrylǵanda zardap shekken feldsher kóz jumdy. 

Bul jaǵdaı Qylmystyq kodekstiń 306-baby (qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý) boıynsha tergelip jatyr.