Igor Lepeha mektepterdi kúzetýge jumyldyrylǵan uıymdarǵa qatysty problemany aıtty
ASTANA. KAZINFORM — Parlament Májilisi janyndaǵy Qoǵamdyq palata otyrysynda «Quqyq buzýshylyqtyń profılaktıkasy týraly» zań jobasyn talqylaý kezinde mektepterdegi qaýipsizdik máselesi kóterildi.
Májilis depýtaty Natalıa Dementeva mektepterdegi kámelet jasyna tolmaǵandardyń tártibine, qaýipsizdigine qatysty usynys aıtty.
- Búginde kúzet uıymdary bilim berý mekemelerine kúzetshi retinde óz jumysyn tıisti deńgeıde atqara almaıtyn adamdardy jiberedi. Olardyń arasynda zeınet jasyndaǵy adamdar barshylyq. Atap aıtqanda, mektepterdegi jaǵdaıdy qadaǵalaýǵa ýchaskelik ınspektorlar da jetispeı jatyr, sondaı-aq kúzet agenttikteriniń ókilderi de tıisti qyzmetti kórsete almaıdy. Máselen, kámeletke tolmaǵandar arasynda kıkiljiń oryn alǵanda, osy ahýalǵa tosqaýyl qoıa alatyn tıisti qyzmetkerler tabylmaı jatady. Búgin talqylanyp otyrǵan zań jobasy aıasynda tıisti ólshemsharttardy ázirlep, retteý is-sharalaryn daıarlaý kerek shyǵar? Shyn máninde, mektepterde shekten shyqqandyq jaǵdaılar bolyp jatady. Osy jaıynda mektep dırektorlary da, ata-analar da shyǵymdanyp jatady, - dedi N.Dementeva.
Óz kezeginde QR Іshki ister mınıstriniń orynbasary Igor Lepeha elimizde halyq sanynyń ósýine baılanysty mektepterdiń sany da artyp kele jatqanyn eske saldy. Ońtaılandyrý is-sharalary nátıjesinde keıingi kezderi polıtseıler sany qysqarǵan. Jalpy, polıtsııa boıynsha bizde 25 myń adam jetispeıdi, onyń ishinde 13 myńy jergilikti polıtsııa - ýchaskelik ınspektorlar men olardyń kómekshiler jáne basqalary.
- Al kúzet agenttikterine toqtalsaq, bul baǵytta Oqý-aǵartý mınıstrligi ókiletti organ sanalady. 100-den astam oqýshysy men pedagog ujymy bar mektepter lańkestik turǵyda osal nysandar sanatyna jatady. Bul rette, Oqý-aǵartý mınıstrligi sýbektilerge talaptardy daıarlady, ıaǵnı týrnıketter, dabyl túımesi jáne kúzet qyzmetine qatysty máselelerdi qamtydy. Eń bastysy, bul turǵyda mınıstrliktiń emes, mektep dırektorynyń quzyretine ekpin qoıylǵan. Konkýrstyq qujattamada dırektor: «mektepti 45 jastan aspaǵan adamdar kúzetýi tıis» dep talap ete alady. Degenmen, jergilikti deńgeıde qarjylandyrýdyń jetispeýi máselesi bar. Dırektorlarǵa az kólemdegi qarjylandyrý ǵana beriledi. Dempıng saldarynan sapasyz qyzmet kórsetetin kúzet fırmalary tartylyp jatady. Sondyqtan jergilikti atqarýshy organdardyń qarjylandyrý problemasyn sheshý kerek, - dedi I. Lepeha.
Eske salsaq, Mańǵystaýda mektep oqýshylary tóbelesip, bir bala aýrýhanaǵa tústi.