Igor Krýtoı «Dostyq» ordenimen nagradtaldy

NUR-SULTAN. QazAqparat - QR Prezıdenti reseılik kompozıtor Igor Krýtoıdy «Dostyq» ordenimen marapattaý týraly Jarlyqqa qol qoıdy, dep habarlaıdy QazAqparat Aqordanyń baspasóz qyzmetine silteme jasap.

Aqordanyń resmı saıtynda Memleket basshysynyń arnaıy jarlyǵy jarııalandy.

«Qazaqstan men Reseı halyqtarynyń arasyndaǵy dostyq pen yntymaqtastyqty nyǵaıtýǵa sińirgen eńbegi úshin kompozıtor Igor ıAkovlevıch Krýtoı ІІ dárejeli «Dostyq» ordenimen nagradtalsyn» delingen onda.

Eske sala keteıik, Reseıdiń halyq ártisi, kompozıtor Igor Krýtoı qazaqstandyq ánshi Dımash Qudaıbergenge udaıy qoldaýyn kórsetip keledi. Buǵan deıin Dımash «Lıýbov ýstavshıh lebedeı» ánin Igor Krýtoıdyń súıemeldeýimen «NTV» telearnasynyń «Tsentralnoe televıdenıe» baǵdarlamasynda shyrqaǵan bolatyn. Kompozıtor Dımash Qudaıbergenniń «Reseı pýblıkasyn baýrap alatynyn» aıtty.

Sondaı-aq, ol qazaqstandyq jas ánshi Erjan Maksımge óziniń mýzykalyq akademııasyna oqýǵa túsip, bilimin shyńdaýdy usyndy.