«Igilik», «Bereke», «Jaılaý»: elde mal sharýashylyǵyna 48,7 mlrd teńge bólindi
ASTANA. KAZINFORM — «Agrarlyq nesıe korporatsııasy» AQ «Igilik», «Bereke» jáne «Jaılaý» baǵyttary boıynsha jalpy somasy 48,7 mlrd teńgege bes áleýmettik-kásipkerlik korporatsııany (ÁKK) qarjylandyrdy.
Ulttyq ekonomıka mınıstrliginiń baspasóz qyzmetiniń málimetinshe, qarajat keıinnen aýyl sharýashylyǵy taýaryn óndirýshilerge asyl tuqymdy mal basyn satyp alýǵa kredıt berýge arnalǵan. Baǵdarlamaǵa qatysatyn ÁKK tizbesi keńeıtilip keledi.
Aqmola oblysyndaǵy «KOKSHE» ÁKK, Jambyl oblysyndaǵy «Taraz» ÁKK, Batys Qazaqstan oblysyndaǵy «Aqjaiyq» ÁKK jáne Soltústik Qazaqstan oblysyndaǵy «Soltústik» ÁKK, Ulytaý oblysyndaǵy «Ulytaý» ÁKK qarjylandyrýǵa qol jetkizdi.
«Igilik» pen «Bereke» sheńberinde fermerler qaryz qarajatyn asyl tuqymdy mal satyp alýǵa jumsaı alady. Qarjylandyrý mólsherlemesi jyldyq 6%, qaryz somasy 5 mlrd teńge. Qarjylandyrý merzimi 84 aıǵa, negizgi borysh pen syıaqyny óteý boıynsha jeńildikti kezeń 24 aıǵa deıin.
«Igilik» jáne «Bereke» kredıtteý baǵdarlamalary Memleket basshysynyń tapsyrmasy boıynsha ázirlengen mal sharýashylyǵyn damytýdyń 2026-2030 jyldarǵa arnalǵan keshendi jospary sheńberinde iske asyrylyp jatyr. Úkimet jospardy salany jańǵyrtýdyń, onyń ónimdiligin arttyrý men eksporttyq áleýetti keńeıtýdiń negizi retinde anyqtap otyr.
2026 jyly mal sharýashylyǵyn jeńildikpen nesıelendirýge 300 mlrd teńge qarastyrylǵan. Keshendi jospar sheńberinde salany damytýdyń túrli baǵytyn qamtıtyn «Igilik», «Bereke» jáne «Jaılaý» kredıttik ónimderi iske qosyldy.
Mal sharýashylyǵy úshin bul eń aldymen maldyń sapasy men ónimdiligi turǵysynan mańyzdy. Keshendi jospar onyń sanyn kóbeıtýdi ǵana emes, sonymen qatar genetıkalyq áleýetti arttyrýdy, asyl tuqymdy mal sharýashylyǵyn, mal basyn kóbeıtýdiń zamanaýı tehnologııalary men óndiristik ınfraqurylymdy damytýdy kózdeıdi.
«Jaılaý» baǵyty da jańa fermalar quryp, jaıylymdyq mal sharýashylyǵyn damytýǵa arnalǵan. Baǵdarlama boıynsha negizgi quraldardy satyp alý men qurylys-montaj jumystaryn júrgizýge qarjylandyrý beriledi. Osylaısha, memlekettik qoldaý salanyń birneshe býynyn qamtıdy: «Igilik» pen «Bereke» asyl tuqymdy mal basyn satyp alýdy qarjylandyrýǵa, al «Jaılaý» nólden bastap, jańa fermalar men reprodýktorlar qurýǵa baǵdarlanǵan. «Jaılaý» baǵyty boıynsha jyldyq 6% mólsherleme boıynsha 120 aıǵa deıingi merzimge 350 mln teńgege deıin qarjylandyrý kózdelgen.
Buǵan deıin Qazaqstan 42 eldiń naryǵyna mal sharýashylyǵy ónimderin shyǵýǵa ruqsat alǵany belgili boldy.
