Igi bastama: Jetimder úıinde aǵylshyn tilin tegin úıretip júr
«Jetim kórseń, jebeı júr» degendi estigenimiz kóp. Al osy sózderdi iske asyratyndar kóp pe? Solardyń biri - temirtaýlyq aǵylshyn tili pániniń muǵalimi Aıjan Zııasheva. Kúnderdiń birinde ol «Aınalaıyn» balalar úıinde qyzmet etetin ápkesimen áńgimelesip otyryp, jetim balalarǵa eshkim aǵylshyn tilin úıretpeıtinin bilgen. Sodan bul oıdy jadyna túıgen Aıjan Zhasproject jobasyna qatysýǵa bel býady. Jobaǵa qatysyp, grant utyp alǵan muǵalim «Aınalaıyn» jetimder úıiniń balalaryn aǵylshyn tiline úırete bastaıdy.
Aıjannyń aıtýynsha, qazirgi kúnge deıin joba aıasynda 50-den astam bala oqytylǵan. Sondaı-aq, bul isti ári qaraı jalǵastyrý úshin aǵylshyn tilin úıretetin eriktilerdi de oqytqan.
«Biz jobanyń aıasynda balalardyń aǵylshyn tilin bilý deńgeıin kóterdik. Sonymen qatar,«Aınalaıyn» balalar úıiniń eresekteý balalaryn kishkentaı tárbıelenýshilerge aǵylshyn tilin oqytýǵa daıarladyq. Zhasproject jobasynyń aıasynda utyp alǵan qarajatqa qajetti jabdyqtardy aldyq. Joba aıaqtalǵan soń da, jumysymyzdy jalǵastyrdyq», - deıdi Aıjan Zııasheva.
Ókinishke oraı, «Aınalaıyn» balalar úıi taratylmaq. Jetim balalardy ár úıge bóledi. Olardyń ári qaraıǵy taǵdyry belgisiz. Bastaǵan jobasy qur qalmaý úshin Aıjan aǵylshyn tilin onlaın-rejımde oqytýdy kózdep otyr.
Kez kelgen til oqytý kýrstaryndaǵydaı, bul jobada da aǵylshyn tili toptarǵa bólinip oqytylady: bastaýysh, jalǵastyrýshy jáne joǵarǵy deńgeı. Ár topqa ózindik baǵdarlama qurylǵan. Bir deńgeıdi meńgergen bala kelesi, anaǵurlym kúrdelirek deńgeıge kóshedi. Sońynda balanyń bilimin tekserý úshin test ótkiziledi. Onlaın kýrstarda da osyndaı keste qoldanylady. Aıjannyń aıtýynsha, bul kýrstarda balany qatań túrde qadaǵalaý joq, ár bala óz nıetimen jáne yntasymen oqıdy.