Igerilmegen jerler memlekettiń ıeligine qaıtarylady - Jer resýrstaryn basqarý agenttiginiń tóraǵasy Q.Otarov
ASTANA. 14 naýryz. QazAqparat - «Jerdi ıgere almaǵan azamattar ony memlekettiń ıeligine qaıtarýlary kerek nemese jerdi ıgerý úshin tıisti sharalar qoldanýy kerek.
Olaı bolmaǵan jaǵdaıda jańa zań talaptaryna sáıkes, biz ıgerilmegen jerlerdi memlekettiń menshigine qaıtaramyz», - dedi búgin Jer resýrstaryn basqarý agenttiginiń tóraǵasy Qadyrhan Otarov jer zańnamalaryn odan ári jetildirý máselesine baılanysty Senat depýtattarymen bolǵan kezdesýden soń jýrnalısterge bergen suhbatynda.
Agenttik tóraǵasynyń málimetterine qaraǵanda, elimizde turǵyn úı salýǵa qajetti qandaı da bir jer telimin alý úshin 1 mıllıon 200 myń adam quzyrly organdarǵa ótinish bergen. Olardyń 30 paıyzyna osy ýaqytta jer berilip úlgergen. Al qalǵan azamattarǵa jer berilgen joq. «Óıtkeni bizde qazir turǵyndarǵa bere salatyn ınfraqurylymy daıyn jerler joq. Al jer berilip, ol jerge úı salýǵa bolmaıtyn bolsa, odan eshkimge de paıda joq. Sondyqtan bizge qazir turǵyndarǵa beriletin jerdiń ınfraqurylymy bolýy asa mańyzdy.
Sondaı-aq jerge ótinish bergen azamattardyń basym kópshiligi oblys ortalyqtary men qalalarda jáne qala mańyndaǵy aýyldarda turady»,-dedi agenttik tóraǵasy.
Onyń sózinshe, Memleket basshysynyń bıylǵy Joldaýynda bul másele kórinis tapty. Sondyqtan turǵyn úı salýǵa beriletin jerlerdiń ınfraqurylymyn damytý máselesine erekshe kóńil bólinip, qomaqty qarjy da jumsalmaq.
«Ókinishke oraı, qazir jer telimderin alyp, ol jerdi qorshap alyp, qurylys jumystary júrip jatyr degen kórinis jasaýǵa umtylyp otyrǵandar jeterlik. Olar shyn máninde eshqandaı da qurylys jumystaryn júrgizbegen, ıaǵnı jerdi ıgermegen. Osyǵan baılanysty qazir Memleket basshysynyń tapsyrmasy negizinde biz jer telimderin tolyq kólemde ınventarızatsııalaý sharalaryn júrgizip jatyrmyz. Osy rette biz árbir jer teliminiń ıesimen kezdesip, jerdi ıgerýdi talap etemiz. Olar qandaı da bir sebeptermen jerdi ıgerý úshin tıisti sharalar qoldanbaıtyn bolsa, biz ol jerlerdi memleket ıeligine qaıtaramyz. Osylaısha biz tártip ornatamyz. Jerge qatysty jaǵdaıdyń osylaısha jalǵasa berýine jol berýge bolmaıdy»,-dedi Q.Otarov.
