Iga Shventek úshinshi ret Rolan Garros týrnıriniń chempıony atandy

ASTANA. QazAqparat – Álemniń 1-raketkasy, Polsha ókili Iga Shventek Rolan Garros týrnıriniń chempıony atandy, dep habarlaıdy QazAqparat tilshisi.

Polıak tennısshisi Frantsııa ashyq chempıonatynyń fınalynda dúnıejúzilik reıtıngte 43-orynda turǵan chehııalyq Karolına Mýhovamen sheberlik baıqasty.

Iga match bastalysymen birden alǵa ketti – 3:0. Set bitkenshe sol basymdylyǵynan aıyrylǵan joq.

Ekinshi partııa da solaı aıaqtalatyndaı kóringen – 3:0. Alaıda K.Mýhova tarazy basyn teńestirip qana qoımaı, ekinshi ret setke dop bergende, óz múmkindigin jibergen joq – 7:5.

Sodan keıin úshinshi, sheshýshi sette breıkpen alǵa shyqty – 2:0. Degenmen álemniń birinshi raketkasy qarap qalmady – 4:4. Aqyry matchty taǵy bir breıkpen túıindedi – 6:4.

Eki saǵat 46 mınýtqa sozylǵan asa tartysty báseke barysynda I.Shventek 1 eıs jasap, 11 breık-poınttyń jeteýin paıdalandy. Qarsylasy 6 eıs, 5 breıkpen (7 breık-poınt) kózge tústi.

Osylaısha, I.Shventek úshinshi ret Rolan Garros jarysynda úzdik shyqty. Buǵan deıin ol 2020 jáne 2022 jyly jeńimpaz atanǵan edi. Bul – sondaı-aq ótken jylǵy AQSh ashyq chempıonatyndaǵy jeńisin qosqanda, «Úlken dýlyǵa» dodalaryndaǵy tórtinshi tıtýly.

Bıylǵy Rolan Garros Karolına Mýhova úshin de tabysty boldy. Ol fınalǵa deıin jetýiniń nátıjesinde aldaǵy dúısenbide álemdik reıtıngte 16-orynǵa kóteriledi.

Eske sala keteıik, budan buryn Novak Djokovıchtiń jetinshi ret Rolan Garros týrnıriniń fınalyna shyqqanyn jazǵan bolatynbyz.

Sondaı-aq Mıhaıl Kýkýshkın AQSh-taǵy jarystyń jartylaı fınalyna ótti.

Qazaqstannyń kishkentaı tennısshileri Azııa chempıonatynyń fınaldyq kezeńine joldama aldy.

Zańǵar Nurlanuly Armenııadaǵy týrnırdiń absolıýtti chempıony atandy.