Igi isterdi qoǵamnyń kóbirek bilgeni abzal — tıflopedagog
Taıaýda ǵana elordada «QR Prezıdenti teleradıokeshenine» qarasty Jibek Joly telearnasyndaǵy «Jaqsy adamdarym» baǵdarlamasynyń bıylǵy qorytyndy sany túsirildi. Atap aıtqanda, birneshe azamat «Jaqsy adam-2023» arnaıy syılyǵymen saltanatty túrde marapattaldy. Sonyń biri - Astanadaǵy №10 mektep-gımnazııanyń tıflopedagogi Sáýle Saǵymbaeva. Kazinform tilshisi ınklıýzıvti bilim berýge úles qosyp júrgen ustazdy sózge tartqan edi.
— Sáýle Lıabıqyzy, aldymen ózińiz týraly aıtyp ótseńiz…
— Týyp ósken jerim — Semeı qalasy. Pedagogıka salasynda 1984 jyldan bastap eńbek etip kelemin. Jalpy bilim beretin mektepten bastadym, qazir eńbek ótilim — 40 jyl. Ýkraınada orys tili mamandyǵyn ıgerdim. Semeıde kózi nashar kóretin balalar oqıtyn mektepte 15 jyl jumys istedim. Tıflopedagogpin. Aldaǵy jyly qańtarda zeınetke shyǵamyn.
— Elordada sizdi qandaı ózgerister kútti? Jumysty neden bastadyńyz?
— 2014 jyly balalarym Astanaǵa kóship kelgennen keıin men de keldim. Ol kezde elordada atalǵan sala endi-endi qolǵa alynyp jatqan, balalar az, arnaıy mektepter joqtyq qasy. Ýaqyt óte kele mektepterde arnaıy kabınetter ashyla bastady. Jalpy kózi nashar kóretin jáne múldem kórmeıtin balalar 8 deńgeıge bólinedi. Ýaqyt óte kele defektolog mamandyǵyn oqydym.
— Qazir qaı mektepte eńbek etip jatyrsyz? Jetistikterińizben bólisseńiz…
— Qazir elordadaǵy № 10 mektep-gımnazııada eńbek etemin. Tájirıbemde 10 jasyna deıin mektepke barmaǵan balany oqytqan kezder boldy. Oǵan sebep, ata-analary namystanady, qoǵamǵa kórsetkisi kelmeıdi, t. s. s. Degenmen, kózi nashar jáne múldem kórmeıtin balalarǵa qoǵamnyń nazary erekshe. Bul erekshe balalar óte zerek keledi.
— «Jaqsy adamdarym» jobasy týraly aıtyńyzshy. Sizge usynys tústi me, álde qatysýǵa ózińiz nıet tanyttyńyz ba?
— Men osy jyldary ustazdarmen tájirıbemdi bólisip, qalalyq, respýblıkalyq deńgeıde túrli semınarlar, trenıngter ótkizip kelem. Qalalyq bilim basqarmasy jáne Oqý-aǵartý mınıstrligi yqpal etti. Sonymen qatar jeke uıymdar da qoldaý kórsetti. Taıaýda mınıstrlikten habarlasty «Jaqsy adamdar» degen respýblıkalyq televızııalyq baǵdarlama bar, balalaryńyzben qatyssańyz» dep. Men usynysty qýana qabyl aldym. Óıtkeni, ıgi isterdi qoǵamnyń kóbirek bilgeni, eńbekti kórsetken abzal. Ol aldymen qoǵamnyń nazaryn aýdarady, ata-analarǵa qoldaý jáne balalardyń damı túsýine, ashyla túsýine yqpaly zor. Mysaly, bir oqýshym bar 40 kompozıtsııany jatqa biledi, onyń ishinde qazaq jáne shetel shyǵarmalary bar. Balalarymnyń ár jetistigin kórip qýanamyn. Olar úshin taǵy bir úlken kómek — sport. Balalardy aptasyna birneshe ret qaladaǵy paralımpıadalyq ortalyqqa aparamyz. Kózi nashar kóretin jáne múldem kórmeıtin balalarǵa arnalǵan kýrs jınaǵyn shyǵardym.
— Joba ótip jatqanda qandaı kóńil-kúıde boldyńyz, qobaljý boldy ma?
— Árıne qobaljý boldy, onyń ústine respýblıkalyq deńgeıde, elimizdiń túkpir-túkpirinen qatysty. Degenmen, úmit boldy árıne. Jeńgenime óte qýanyshtymyn, bul jeńis — kóptegen pedagogtiń eńbegi, men jalǵyz ózim eshteńe de isteı almas edim. Uıymdastyrýshylarǵa myń alǵys. Árıne, bul baǵyttaǵy jumystardy jalǵastyramyz.
Aıta keteıik, Jibek Joly telearnasyndaǵy «Jaqsy adamdarym» jobasynyń maqsaty — ártúrli salada eńbek etip, el damýyna ólsheýsiz úles qosyp júrgen myqty mamandardy, eńbek adamdaryn, qaıyrymdy jandardy halyqqa tanystyrý. Bıyl dástúrli is-sharada bilim, ǵylym, medıtsına, sport jáne qutqarý qyzmeti boıynsha 7 adamǵa arnaıy syılyq tapsyryldy.
