Igi ister marafony: Astanada eriktiler qart kisilerdiń aýlasynyń qaryn tazalaýǵa kómektesedi
Igi ister marafony aıasynda elorda eriktileri zeınetkerler men halyqtyń áleýmettik osal toptary sanatyndaǵy kómekke muqtaj azamattardyń aýlalarynyń qaryn kúrep beredi, dep habarlaıdy Kazinform Astana ákimdiginiń resmı saıtyna silteme jasap.
Elordada birneshe kún boıy qar jaýyp, aýlalar aq ulpaǵa orandy. Qalyń qardy arshý ásirese egde jastaǵy jáne jalǵyzbasty adamdarǵa qıyn, olar aýlalaryn óz betinshe kúreı almaıdy. Osyǵan baılanysty «Astana jastary» eriktileri Kóktal turǵyn alabynyń jeke sektorynyń turǵyndaryna kómekke keldi. Olar aýlalardyń qaryn tazalap, saraılar men jertólelerge, úılerdiń kireberisine deıingi joldardy tazartty.
«Astana jastary» KMM eriktisi Dana Takenova volonterlik qyzmetpen birneshe jyldan beri aınalysyp keledi. Ol adamdardy jaqsylyq jasaýǵa, qaıyrymdy ispen aınalysýǵa shaqyrdy.
«Búgin biz ata-ájelerimizge qar kúreýge kómektestik. Atalmysh aktsııany jyl saıyn ótkizip júrmiz. Qar kúreýden bólek, kommýnaldyq qyzmet mamandaryna baýyrsaq pen ystyq shaı taratamyz. Bul syqyrlaǵan sary aıazda adamdarǵa erekshe kóńil syılaıdy. Qalamyzdaǵy jastardy eriktilerden úlgi alýǵa shaqyramyn. Bizdiń qatarymyzǵa qosylyńyzdar!» - dedi Dana.
Jergilikti turǵyndar volonterlerdiń kómegin baǵalap, olarǵa alǵys bildirdi.
«Jastarymyz qandaı tárbıeli bolyp ósip keledi. Jer úıde turǵandyqtan qysta tolassyz jaýǵan qar qıyndyq týdyrady. Qaqpany japqannan keıin, keıde syrtqy esikti ashý múmkin bolmaı qalady. Jastarǵa rızamyn. Árdaıym kómektesip turady», - deıdi elordalyq turǵyn.
Elordalyq eriktiler qystygúni qar tazalaýǵa kómektesýmen qatar, halyqtyń áleýmettik osal toptarynan shyqqan otbasylarǵa azyq-túlik sebetterin tasymaldaıdy, qart kisilerge otyn jarýǵa kómektesedi jáne kommýnaldyq qyzmet mamandaryna ystyq shaı beredi.
Esterińizge sala keteıik, Astanada ıgi ister marafony bastaldy.
