IFSB Bas hatshysy: Qazaqstanda ıslamdyq saqtandyrý naryǵyn damytý qajet
NUR-SULTAN. QazAqparat – IFSB (Islam qarjylandyrý qyzmeti keńesi) bas hatshysy, doktor Bello Laval Danbatta Qazaqstanda ıslam saqtandyrý qyzmeti naryǵyn damytý qajettigi týraly aıtty, dep habarlaıdy QazAqparat tilshisi.
Aıta keteıik, elordada Islam qarjylandyrý qyzmeti keńesiniń (Islamic Financial Services Board - IFSB) aptalyǵy ótip jatyr.
«Osy aptalyq aıasynda ıslamdyq saqtandyrý máselesi boıynsha semınar uıymdastyryldy. Bul shara barysynda Qazaqstan jáne Ortalyq Azııada kapıtal naryǵyn damytýǵa qatysty qadamdar pysyqtaldy. Biz banktik sektordyń belsendi damýyn baıqap otyrmyz. Sonymen qatar, saqtandyrý qyzmetteri, onyń ishinde ıslamdyq saqtandyrý Qazaqstanda jáne TMD elderinde damýy kerek dep sanaımyz», - dedi Bello Laval Danbatta tilshiler saýalyna jaýap bere otyryp.
Onyń sózine qaraǵanda, Islam qarjylandyrý qyzmeti keńesi aptalyǵy aıasynda ıslamdyq qarjy naryǵyna baılanysty jumys toptarynyń otyrystary ótti.
IFSB - Islam qarjylandyrýy ınstıtýttarynyń tıimdi qadaǵalanýy men retteýi boıynsha talaptardy daıyndaıtyn halyqaralyq organ.
AHQO 2017 jyldan beri IFSB-nyń turaqty ókili. Bul uıymnyń ókili bolý Islam qarjylandyrýy ınstıtýttarynyń biregeı talaptaryn daıyndaý kezinde tıimdi járdemdestik tanytýǵa kómektesedi.
