IFSB bas hatshysy Qazaqstanda ıslamdyq qarjylandyrý múmkindigine baǵa berdi
NUR-SULTAN. QazAqparat – IFSB (Islam qarjylandyrý qyzmeti keńesi) Bas hatshysy, doktor Bello Laval Danbatta Qazaqstanda ıslamdyq qarjylyq qyzmetter naryǵyn damytý bolashaǵy týraly pikir bildirdi, dep habarlaıdy QazAqparat tilshisi.
«Biz osy elde ıslamdyq qarjylandyrýdy damytý úshin úlken áleýetti baıqap turmyz. Óıtkeni Qazaqstanda TMD elderine shyǵýǵa úlken múmkindikteri bar. Sáıkesinshe, bul elderdegi musylmandar emin-erkin ıslamdyq qarjylandyrýǵa qol jetkize alady», - dedi Bello Laval Danbatta tilshiler saýalyna jaýap bere otyryp.
Sarapshynyń atap ótýinshe, ıslamdyq qarjylandyrýdy damytý úshin Qazaqstanda zańnamaǵa tıisti ózgerister engizý qajet.
«Úkimet ınfraqurylymdyq turǵyda, zańnamaǵa qajetti ózgerister boıynsha qajetti qoldaý jasap keledi. Jalpy, ıslamdyq qarjylandyrý boıynsha ındýstrııa salasy tarapynan qyzyǵýshylyqty baıqap turmyz», - dedi IFSB bas hatshysy.
Onyń sózine qaraǵanda, «Astana» halyqaralyq qarjy ortalyǵy jumysyn bastaǵaly bilikti mamandar osy salaǵa belsendi túrde tartylýda. Bul rette jastardyń arasynda qyzyǵýshylyq tanytyp otyrǵandar kóptep kezdesýde.
Budan buryn habarlanǵandaı, elordada Islam qarjylandyrý qyzmeti keńesiniń (Islamic Financial Services Board - IFSB) aptalyǵy ótip jatyr.
Sonymen qatar, IFSB (Islam qarjylandyrý qyzmeti keńesi) bas hatshysy Qazaqstanda ıslamdyq saqtandyrý naryǵyn damytý qajettigin atap ótti.
