Ierýsalımdegi ýltraońshyldar sherýi Izraıl men Gaza sektorynyń zymyrandy atysyna ákeldi
IERÝSALIM. QazAqparat – Palestına anklavyndaǵy sodyrlar Izraıldiń ońtústigine zymyran ushyrǵannan keıin, olar da Gaza sektoryndaǵy nysandarǵa áýe shabýylyn jasady, dep habarlaıdy QazAqparat tilshisi The Times of Israel-ge silteme jasap.
Sársenbide júzdegen ızraıldik ýltraultshyldar Ierýsalım Eski qalasynyń aınalasyndaǵy palestındik aýdandarda «Jalaýlar sherýin» ótkizdi. Olar polıtsııanyń tyıym salǵanyna da, HAMAS qozǵalysynyń qaýipti málimdemelerine de qaramady.
Buǵan deıin atalǵan qozǵalys ókili josparlanǵan sherý Ierýsalım arqyly ótetin bolsa, sherýshilerge «qasıetti jerlerine jaqyndaýǵa» jol berilse, Izraıl «onyń saldary úshin tolyq jaýap beretinin» aıtqan edi.
Sharany ótkizýge ruqsat bermeýge polıtsııanyń quqy joq, biraq olar ótken jyly ne bolǵanyn biledi. Ierýsalım kúni uıymdastyrylǵan osyndaı sherýden keıin Gaza sektory astanaǵa oq jaýdyryp, «Dýaldar kúzeti» áskerı operatsııasynyń bastalýyna ákelgen bolatyn. Sondyqtan, polıtsııa sherý merzimin aýystyryp, baǵyt josparyn qaıta qaraýdy usyndy. Alaıda, «Jalaýlar sherýshileri» polıtsııanyń ótinishine qulaq aspady.
Sherýdi palestınalyqtar Izraıldiń daýly qalany baqylaýynyń arandatýshylyq kórinisi retinde qabyldady. Jaýap retinde Gaza sektorynan eldiń ońtústigindegi Sderot qalasyna bes zymyran ushyryldy. Izraıldik BAQ-tyń habarlaýynsha, zymyrandardy áýe qorǵanysy kúshteri qaǵyp túsirgen.
Tel-Avıv zymyranmen shabýyldaý jaýapkershiligin HAMAS-qa artqannan keıin eldiń áskerı áýe kúshteri Gaza sektoryndaǵy zymyran qozǵaltqyshtaryn shyǵarýǵa arnalǵan zattar saqtalatyn oryndarǵa qarymta soqqylar jasady.
Beısenbi kúni tańerteń Hram taýynda palestınalyqtar men ızraıldik polıtsııa arasynda taǵy qaqtyǵys bastaldy. The Times of Israel habarlaýynsha, Izraıl polıtsııasynyń málimetine sáıkes, betperde kıgen ondaǵan búlikshi Al-Aksa meshitine kirip, esikterdi jaýyp, ofıtserlerge tas pen feıerverk laqtyra bastaǵan. Polıtseıler de olarǵa qarsy quraldar paıdalanady. Meshittegi tártipsizdikti uıymdastyrǵan Shyǵys Ierýsalımniń jeti turǵyny qamaýǵa alynǵan. «Qyzyl Jarty Aı» uıymynyń málimetinshe, qaqtyǵys kezinde 20 palestınalyq jaraqat alǵan.
Aıta keteıik, Ierýsalımdegi Al-Aksa meshiti - Hram taýy dep te atalady. Ol musylmandar úshin de, evreıler úshin de qasıetti oryn bolyp sanalady. Al, bıyl musylmandardyń qasıetti Ramazan aıy men evreılerdiń Pesah merekesi qatar kelip tur.
Eske salsaq, Izraıldegi áskerı operatsııa kezinde 5 palestınalyq qaza tapqan edi.
