Ierýsalımdegi teraktide alty adam qaza tapty

ASTANA. KAZINFORM — Ierýsalımdegi qaıǵyly oqıǵa aımaqtaǵy qaýipsizdik máselesin taǵy bir márte kóterdi, dep habarlaıdy Kazinform tilshisi.

Dúısenbi kúni tańerteń eki palestınalyq Ierýsalımniń soltústigindegi aıaldamada adamdarǵa oq jaýdyrdy. Shabýyl saldarynan alty adam qaza taýyp, onnan astamy túrli dárejede jaraqat aldy. Bul týraly The Times of Israel habarlady.

Shabýylshylar qalanyń soltústigindegi Ramot qıylysyna deıin jetip, qoldan jasalǵan «Karlo» pýlemetinen beı-bereket oq jaýdyrǵan. Tórt adam oqıǵa ornynda, taǵy ekeýi aýrýhanada kóz jumdy. Dárigerlerdiń habarlaýynsha, zardap shekkenderdiń jeteýi aýyr halde, taǵy birnesheýi ortasha jáne jeńil jaraqat alǵan.

Izraıl polıtsııasy shabýyl jasaǵandardyń Ramallanyń ońtústik-shyǵysynda ornalasqan Katanna jáne ál-Kýbaıba aýyldarynan shyqqanyn anyqtady. Olar oqıǵa ornynda qarýlanǵan sarbaz ben sol mańda júrgen azamattyń kómegimen ustaldy. Lańkesterdiń kóliginen qarý-jaraq, oq-dári jáne pyshaq tabyldy.

Qaıǵyly oqıǵa bolǵan jerge Izraıl premer-mınıstri Bınıamın Netanıahý kelip, elde «terrorǵa qarsy soǵys» júrip jatqanyn aıtty.

— Biz lańkester shyqqan aýyldardy qorshaýǵa aldyq. Gaza sektorynda urys jalǵasyp jatyr. Biz HAMAS-ty joıyp, tutqyndaǵylardy bosatyp, qaýipsizdikke qol jetkizemiz, — dedi ol.

Izraıl premer-mınıstriniń aıtýynsha, qaýipsizdik qyzmeti bıylǵy jyly júzdegen shabýyldyń aldyn aldy, biraq Ramottaǵy qaıǵyly oqıǵa qaýipti eske túsirdi.

Izraıl prezıdenti Itshak Gertsog oqıǵany «aýyr jáne azapty tań» dep atap, qaza bolǵandardyń otbasylaryna kóńil aıtty.

— Álem bizdiń qandaı absolıýtti zulymdyqpen kúresip jatqanymyzdy túsinýi kerek. Terror bizdi syndyra almaıdy, — dedi ol.

Qarjy mınıstri Bezalel Smotrıch óz jaýabynda Palestına bıliginen «kartadan joǵalyp ketýdi» talap etip, shabýyl jasaǵan aýyldardyń bolashaǵyn qıraǵan Rafah pen Beıt Hanýnmen salystyrdy. Onyń málimdemesi jaqynda Iordan ózeniniń Batys jaǵalaýynyń 82 paıyzyn anneksııalaý týraly usynys kezinde jasaldy.

Osydan buryn Izraıl Gaza sektoryndaǵy kópqabatty ǵımaratty qıratqanyn jazǵan edik.