Ierýsalımde ýltraortodoks evreıler jappaı narazylyqqa shyqty

ASTANA. KAZINFORM – Beısenbi kúni Ierýsalımde júzdegen myń ýltraortodoks evreı jınalyp, Izraıl Qorǵanys kúshterine (TsAHAL) ýltraortodoks er adamdardy shaqyrýǵa qarsy narazylyq namazyn ótkizdi. Demonstranttar qalanyń negizgi kireberisterin jaýyp tastady. Bir adam qaza tapty, dep jazdy BBC.

15 jasar jasóspirim basqa demonstranttar tobymen birge qurylysy aıaqtalmaǵan ǵımaratqa shyǵyp, bıikten qulap, mert boldy.

Kúnniń sońynda uıymdastyrýshylar aktsııanyń aıaqtalǵanyn jarııalap, jınalǵandardy beıbit túrde taraýǵa shaqyrdy, alaıda tarqaǵannyń ornyna júzdegen jas ortodokstar polıtsııamen qaqtyǵysyp, narazylyqty ýshyqtyra tústi.

Aqparatqa saı, jappaı narazylyqty Knessettegi ýltraortodoks partııalar qoldaǵan.

Izraılde 18 jasqa tolǵan jas jigitter men qyzdar úshin áskerı qyzmet mindetti, biraq ýltraortodokstar árdaıym áskerı boryshtan bosatylyp kelgen. Bul másele eldegi zaıyrly jáne ortodoks saıasatkerler arasynda uzaq ýaqyttan beri qyzý talqylaýdyń taqyryby bolyp keledi.

Ótken jyldyń maýsymynda Izraıl Joǵarǵy soty eshıv stýdentteri (ýltraortodoks evreılerdiń oqý oryndary) barlyq azamattar sııaqty áskerı qyzmetke shaqyrylýy kerek dep sheshim qabyldady jáne úkimetke sáıkes zań jobasyn daıyndaýdy tapsyrdy.

Aıta keteıik, BUU soty Izraılden Gazadaǵy gýmanıtarlyq baǵdarlamalardy jeńildetýdi talap etti.