Ienniń álsireýi: pandemııadan keıin alǵash ret japondardyń shetelge saıahaty azaıady
ASTANA. KAZINFORM – Japonııadan shetelge shyǵatyn týrıster sany bıylǵy jazǵy demalys kezeńinde 8,8 paıyzǵa azaıyp, 2,17 mln adamdy quraıdy dep boljanyp otyr. Bul – pandemııadan keıin týrızm qalpyna kele bastaǵan 2023 jyldan bergi alǵashqy tómendeý, dep habarlaıdy Kyodo.
JTB Corp. iri týrıstik agenttiginiń málimetinshe, buǵan ıenniń álsireýi men shyǵyndardyń artýy áser etken.
Kompanııanyń 15 shilde men 31 tamyz aralyǵyna jasaǵan boljamyna sáıkes, saıahat qunynyń qymbattaýy týrısterdi Soltústik Amerıka men Aýstralııa sııaqty alys baǵyttardan bas tartýǵa májbúrlep otyr. Sonymen qatar ınflıatsııa jaǵdaıynda halyqtyń únemdeýge kóshýine baılanysty ishki týrızm de tómendeýi múmkin.
Shetelge bir ret saparlaýǵa bir adam jumsaıtyn ortasha shyǵyn 6,3 paıyzǵa artyp, 323 myń ıenge, ıaǵnı shamamen 2 myń dollarǵa jetedi dep boljandy.
Sheteldegi shyǵyndardyń ósýine ıenanyń álsireýinen bólek, Taıaý Shyǵystaǵy daǵdarys saldarynan avıatsııalyq otyn baǵasynyń qymbattaýy jáne otynǵa salynatyn qosymsha alymdardyń ósýi de áser etip otyr.
Áýe bıleti salystyrmaly túrde arzan jaqyn elderge suranys joǵary. JTB baǵalaýynsha, eń tanymal baǵyttardyń kóshin 26,2 paıyzben Ońtústik Koreıa bastap tur. Odan keıin 16,2 paıyzben Taıvan keledi.
Premer-mınıstr Sanae Takaıchıdiń byltyr qarashada Taıvanǵa qatysty aıtqan málimdemesinen keıin Tokıo men Beıjiń arasyndaǵy qarym-qatynastyń shıelenisýine baılanysty Qytaıǵa saparlar sany ótken jylǵy kórsetkishtiń jartysyna deıin azaıyp, 10,1 paıyzdy quraıdy dep kútilip otyr.
Japonııa ishindegi saparlar sany ótken jylmen salystyrǵanda 4,4 paıyzǵa tómendep, 69 mln-ǵa jetedi dep boljandy. Al bir adamnyń ortasha shyǵyny 3,2 paıyzǵa artyp, 48 500 ıendi quraıdy.
Tokıo kiretin eldiń shyǵysyndaǵy Kanto óńiri 19 paıyz kórsetkishpen eń tanymal baǵyt bolady dep kútilip otyr. Odan keıin Japonııanyń batysyndaǵy Kınkı óńiri – 14,9 paıyz jáne eldiń soltústigindegi Hokkaıdo – 11,2 paıyz kórsetkishpen ornalasqan.
Jalpy úrdis turǵyndardyń shyǵynǵa talǵammen qaraı bastaǵanyn kórsetedi.
– Demalys merzimin qysqartý sııaqty tásildermen shyǵynyn azaıtatyndar men qymbat bolsa da, qalaǵan saparyna barǵysy keletinder arasynda aıyrmashylyq artyp keledi, – dedi JTB ókili.
JTB bul boljamdy maýsym aıynda atalǵan jazǵy demalys kezeńinde keminde bir túnge saparǵa shyǵýdy josparlaǵan adamdar arasynda júrgizilgen onlaın saýalnama negizinde jasaǵan.
Aıta keteıik, buǵan deıin Japonııada kompanııalardyń bankrotqa ushyraýy 12 jyldaǵy eń joǵary deńgeıge jetkenin jazdyq.
