Ielik etýge ruqsat etilgen qarý sany 2-ge deıin tómendetiledi - zań jobasy
ANA. 10 Qarasha. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR keıbir zańnamalyq aktilerine qoǵamdyq qaýipsizdikti qamtamasyz etý salasynda ishki ister organdarynyń qyzmetin jetildirý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Zań jobasy elimizdegi kúzet qyzmetin, qarý aınalymyn baqylaýǵa jáne qoǵamdyq qaýipsizdikti qamtamasyz etý boıynsha ishki ister organdary qyzmetiniń jekelegen baǵyttaryn jetildirýge baǵyttalǵan. Sonymen qatar, zań jobasynda Memleket basshysynyń «QR quqyq qorǵaý qyzmeti men sot júıesiniń tıimdiligin arttyrý jónindegi sharalar» týraly Jarlyǵyn oryndaý tetikteri de qarastyrylǵan. Máselen, qujat boıynsha qoǵamdyq tártipti buzýshylardy medıtsınalyq aıyqtyrǵyshtarǵa jetkizý jónindegi fýnktsııalaryn qospaǵanda, medıtsınalyq aıyqtyrǵyshtardyń qyzmetine baılanysty fýnktsııalary men ókilettikterin Densaýlyq saqtaý mınıstrliginiń qaramaǵyna berý kózdeledi.
Budan bólek, kámeletke tolmaǵandardy ýaqytsha oqshaýlaý, beıimdeý jáne ońaltý ortalyqtarynyń qyzmetine baılanysty fýnktsııalary men ókilettikterin Bilim jáne ǵylym mınıstriniń qaramaǵyna berý sharalary qarastyrylady.
«Zań jobasyndaǵy qarý aınalymyn baqylaýdy júzege asyrý normasy boıynsha ruqsat etilgen qarý túrlerin ıelik etýdiń sany qazirgi qoldanystaǵy zańnamada 5-eý dep kórsetilse, bul 2 birlikke deıin qysqartylady. Jeke kúzet uıymdaryna ıir oıyqty atys qarý túrlerin ustaýǵa tyıym salynady. Al elektrlik qarý-jaraqtardy mindetti túrde ishki ister organdaryna tirkeý usynylady. Atys qarýynyń ıelerine turǵylyqty ornyn aýystyrý barysynda qarýdy esepten shyǵaryp, jańa meken-jaıy boıynsha 10 kúnniń ishinde ishki ister organyna qaıta tirkeýden ótkizý mindetteledi», -dedi zań jobasy boıynsha baıandaǵan ІІM orynbasary Aleksandr Kýlınıch.
Onyń aıtýynsha, qujatqa sáıkes kúzet qyzmetin baqylaý jumysy da kúsheıtiledi. Máselen, kúzet qyzmeti sýbektileriniń sany azaıtylady.
Birshama talqylaýdan keıin palata depýtattary zań jobasyn birinshi oqylymda maquldady.
