Ieliginde birneshe kólik pen jyljymaıtyn múlki bar otbasylardy áleýmettik qoldaý toqtatylýy múmkin

ASTANA. KAZINFORM — Eńbek jáne halyqty áleýmettik qorǵaý mınıstri Svetlana Jaqypova Senat kýlýarynda jýrnalısterge áleýmettik kómekti saralap tóleýdiń jańa tártibiniń mánin túsindirdi.

— Búgingi tańda bul tártipti ilki joba retinde Shymkent qalasy men Qaraǵandy oblysynda iske asyryp bastadyq. Keıin ony búkil respýblıkaǵa taratý jospary bar. Biraq taratpaı turyp normatıvtik-quqyqtyq aktiler qabyldaý kerek. Biz memleketten áleýmettik kómek alyp júrgenimen ıeliginde kottedji, 2-3 kóligi bar azamattardy anyqtadyq. Kópbalaly analardyń arasynda ondaılar bar dep naqty aıta almaımyn. Biraq 6-sanatqa otbasylar kóp arasynan ondaı faktiler kóp. Bul otbasylarda 800 myńnan astam adam turyp jatyr, — dedi mınıstr.

Vedomstvo basshysy bul ózgeris otbasynyń jan basyna shaqqandaǵy tabysyn ıeligindegi kólik pen jyljymaıtyn múlik qunymen qosyp esepteýdi kózdeıtinin aıtty.

— Otbasynyń jan basyna shaqqandaǵy tabysy eń tómengi kúnkóris deńgeıiniń 4 eselengen mólsherinen assa, 2 jáne odan kóp avtokólik quraly bolsa, eki jáne odan kóp jyljymaıtyn múlik bolsa, óziniń damýyna ınvestıtsııa salatyn adamdar týraly aıtyp otyrmyz. Áleýmettik ádildik qaǵıdaty dep otyrǵanym da osy. Olarǵa qoldaý qajet emes. Reforma solarǵa qatysty. Qalǵan sanattarǵa ýaıymdaýdyń qajeti joq, — dedi Svetlana Jaqypova.

Buǵan deıin ol áleýmettik qamsyzdandyrý salasyn tsıfrlandyrý qaǵaz júzinde negizsiz jazylǵan málimetter ashyp jatqanyn aıtqan edi.