Ideıalar mekeni: Atyraýda kreatıvti ındýstrııany damytýǵa arnalǵan hab ashyldy
ATYRAÝ. KAZINFORM — Atyraý qalasynda «Atyrau Creative Hub» shyǵarmashylyq haby ashyldy.
Joba óńirde kreatıvti ındýstrııalardy damytý, jastardyń shyǵarmashylyq áleýetin arttyrý jáne zamanaýı orta qalyptastyrýǵa baǵyttalǵan. Jalpy aýmaǵy shamamen 1600 sharshy metrdi quraıtyn keńistik kovorkıng aımaqtary, medıa stýdııalar, oqý aýdıtorııalary men konferents-zaldardy qamtıdy.
Aıta ketý kerek, buǵan deıin óńirde shyǵarmashyl jastardy biriktiretin mundaı keshendi alań bolmaǵan. Jańa hab osy olqylyqtyń ornyn toltyryp, ıdeıalardy naqty jobaǵa aınaldyrýǵa múmkindik beredi.
Nysandy aralap, jastarmen tildesken oblys ákimi Serik Shápkenov kreatıvti ındýstrııanyń mańyzyn atap ótti.
— Bul baǵyt jastardyń áleýetin ashyp, jańa múmkindikterge jol ashady. Mundaı ortalyq óńirdiń damýyna serpin beredi. Ákimdik tarapynan qajetti tehnıkamen qamtýǵa kómektesemiz, — dedi ol.
Hab jastardyń bilim alyp, tájirıbe almasýyna jáne jańa jobalardy iske asyrýyna jaǵdaı jasap, olardyń óńirde turaqtaýyna yqpal etedi. Ashylý kúni kreatıvti damytý qorynyń ókilderimen kezdesý, qysh, kıiz basý, zergerlik buıymdar jasaý ónerinen sheberlik sabaqtary, kitapsúıer qaýymnyń ınteraktıv formatynda talqylaýy ótti.
Buǵan deıin Prezıdent kreatıvti ındýstrııalardy qoldaýǵa qatysty zańǵa qol qoıǵan edi.
