Ideologııa maıdanynyń jaýyngerleri - jýrnalısterdiń eńbekaqylaryn áskerı qyzmetkerlerdikine teńestirý qajet -Senat depýtaty

Senatordyń aıtýynsha, el táýelsizdiginiń kók baıraǵyn, ıaǵnı memleketimizdiń táýelsizdigin jappaı-turmaı jyrlap, táýelsiz memleketimizdi 20 jyldaı qysqa merzimge aıdaı álemge tanytqan Qazaqstan Respýblıkasynyń Tuńǵysh Prezıdenti Nursultan Nazarbaevtyń qazaqstandyqtar men adamzat múddesi úshin jasap jatqan uly da ǵıbratty isterin asqan zor shabytpen jazyp, el men memlekettiń múddesi úshin jankeshtilikpen adal qyzmet etip kele jatqan mamandyq ıeleriniń biri - buqaralyq aqparat quraldarynyń ókilderi, ıaǵnı jýrnalıster bolyp tabylady. «Qazir táýelsiz Qazaqstannyń jýrnalıstıkasy ózindik damý ári qarym-qabileti joǵary, álemdegi eń yqpaldy ári bedeldi orynǵa ıe boldy. Jýrnalıstıkanyń bolashaǵy men damýynyń jaǵdaıyn oılaıtyn bolsaq, endigi ári Úkimet tarapynan bul salaǵa da nazar aýdarý qajet dep sanaımyn. Qazir elimizde jýrnalısterge degen zárýlik bar. Sondyqtan da jýrnalıst mamandardy daıarlaıtyn memlekettik joǵary oqý oryndaryndaǵy stýdentter sanyn kóbeıtý jáne jýrnalıstıka fakýltterine beriletin jyl saıynǵy grantty kóbeıtip, jýrnalısterdiń bilimi men biliktilikterin arttyrýdy uıymdastyrý qajet»,-dedi depýtat.

Onyń sózine qaraǵanda, eldegi oqý oryndarynda ázirlenip jatqan jýrnalıst mamandardy daıyndaýdyń sapasyna da kóńil bóletin ýaqyt jetti. «Jýrnalısterdiń materıaldyq-turmystyq jaǵdaılaryn jaqsartý máselelerine kóńil bóletin kez keldi. Buqaralyq aqparat quraldarynyń qyzmetkerleri ne memlekettik qyzmetshi, ne bıýdjettik sala kategorııasyna jatqyzylmaıdy. Osydan kelip olar eń aqyry memlekettik turǵyn úı baǵdarlamasy boıynsha páter de ala almaı jatyr. Eńbekaqylary tómen bolǵannan keıin olarǵa bankter nesıe, ıpoteka berýden de irgelerin aýlaq salady. Jýrnalıster ıdeologııa maıdanynyń jaýyngerleri bolsa, endigi arada jýrnalısterdiń eńbekaqylary men zeınetaqylaryn áskerı qyzmetkerlerdiń eńbekaqylary men zeınetaqylaryna teńestirý qajet. Sondaı-aq olarǵa qoǵamdyq kólikterde tegin júrý quqyǵyn berip, bul quqyq ardagerlerge de taratylýy kerek»,-dedi J.Erǵalıev.

Sondaı-aq ol sózinde 2012 jyldyń baspasózine jazylý bastalǵandyǵyn, al Qazposhtanyń keıbir jergilikti jerdegi fılıaldary ózderiniń qyzmet kórsetý tarıfterin 15-20 paıyzǵa ósirgeli otyrǵandyǵyn atap ótti. «Bul jaǵdaı respýblıkadaǵy gazet-jýrnaldardyń jazylý baǵasynyń ósýine ákelip soqqaly tur. Baǵa óskennen keıin taralym kemıdi. Bul ásirese memlekettik tildegi buqaralyq aqparat quraldaryn kúızeliske ushyratady. Sondyqtan poshta qyzmeti tarıfiniń ósirilýine jol berilmeýi kerek. Jýrnalıstıka bıznes emes, jýrnalıstıka - ıdeologııa, jýrnalıstıka -tárbıe. Olaı bolsa biz jýrnalıst kadrlaryn daıyndaý isin memleketimizdiń ıdeologııasynyń bolashaq kadrlaryn, ósıetti sózderimen halyqqa jáne qalyń buqaraǵa tárbıe beretin, oı aıtatyn erekshe bir mamandyq ıelerin daıarlaý dep qaraǵanymyz abzal. Mine, osy jáne buryn da aıtylyp kele jatqan oı-pikirlerdi jınaqtaı kele úkimettiń Qazaqstanda jýrnalıst kadrlaryn daıarlaý jáne jýrnalısterdiń mártebesi týraly máseleni qarap, ázirleýin suraımyn»,-dedi senator.