«Idaı» tsıklony Afrıkanyń ońtústigin oırandap ketti
ASTANA. QazAqparat - Mozambıkte «Idaı» tropıkalyq tsıklonynan qaza tapqandar sany myńdaǵan adamǵa jetýi múmkin, dep málimdedi el prezıdenti Fılıpe Nıýsı. Bul týraly QazAqparat VVS-ǵa silteme jasap habarlaıdy.
Tsıklon saldarynan beısenbi kúni Beıra qalasyna jaqyn mańda kóshkin bolǵan, alaıda qatty jelge baılanysty qutqarýshylar qalaǵa tek jeksenbi kúni jetken.
Resmı statıstıka boıynsha, sý tasqyny men alapat daýyl saldarynan 84 adam mert bolǵan. Kóptegen úıler qıraǵan.
Jalpy Afrıkanyń ońtústiginde 180 adam tabıǵı apattyń qurbany bolyp otyr. Halyqaralyq Qyzyl Kres jáne Qyzyl Jarty aı qoǵamdastyǵy federatsııasy bul jaǵdaıdy «aýqymdy jáne jantúrshigerlik» dep atady. Uıym ókili Djeımı LeSer qutqarýshylardyń adamdardy aǵashtardan túsirgenin aıtty.
Kórshi Zımbabvede 98 adam qaza tapsa, 217 adam iz-túzsiz joǵalǵandar tiziminde.
Sondaı-aq, Malavı de aıtarlyqtaı zardap shekken. Qatty jaýyn-shashynnan keıingi sý tasqynynan 122 adam qaza tapqan, dep habarlaıdy Reliefweb.
Mozambıkte kem degende 84 adam kóz jumǵan. Olardyń basym bóligi - Beıra qalasynyń turǵyndary. Bul kólemi boıynsha 500 myń turǵyny bar eldegi tórtinshi qala.
1500-den astam adam aǵashtardyń qulaýy men ǵımarattardyń qıraýy saldarynan zardap shekken, dep habarlaıdy VVS tilshisi Joze Tembe.
