ICAO basshysy Qazaqstanda azamattyq avıatsııany damytý jumystaryna oń baǵa berdi
ASTANA. KAZINFORM – Qazaqstan Respýblıkasynyń Premer-mınıstri Oljas Bektenov Halyqaralyq azamattyq avıatsııa uıymy (ICAO) keńesiniń Prezıdenti Salvatore Shakkıtanomen kezdesti, dep habarlaıdy Úkimettiń baspasóz qyzmeti.
Olar elimizdiń áýe kóligin álemdik standarttarǵa sáıkes damytý salasyndaǵy yntymaqtastyq máselelerin talqylady.
Premer-mınıstr Oljas Bektenov Memleket basshysy Qasym-Jomart Toqaevtyń azamattyq avıatsııany damytýǵa jáne áýe kóliginiń jolaýshylardyń barlyq sanatyna qoljetimdi bolýyna kóp kóńil bóletinin atap ótti. Jańa áýejaılar men áýeaılaqtardy salý jáne jumys istep turǵan áýejaılardy jańǵyrtý asa mańyzdy.
Qazaqstanda júrgizilgen qurylymdyq jáne zańnamalyq reformalar salany brıtandyq model boıynsha damytý úshin jaǵdaı jasady. QR avıatsııa salasynyń ICAO standarttaryna sáıkestik deńgeıi 2009 jylǵy 47%-dan bıyl 82%-ǵa deıin ósti, bul Polsha, Chehııa, Danııa sııaqty jáne taǵy da basqa Eýropa memleketteriniń kórsetkishterimen salystyrylady. Bul Eýropalyq Odaq elderine ushýdy keńeıtýge múmkindik berdi.
«Biz halyqaralyq azamattyq avıatsııa uıymymen ózara is-qımylǵa tereń mán beremiz jáne ekijaqty yntymaqtastyǵymyzdy avıatsııa salasyn damytýdy qamtamasyz etýdegi strategııalyq basymdyq retinde qarastyramyz», – dep atap ótti Oljas Bektenov.
Óz kezeginde, Halyqaralyq azamattyq avıatsııa uıymy keńesiniń Prezıdenti Salvatore Shakkıtano Qazaqstanda azamattyq avıatsııany damytý boıynsha júrgizilgen jumystarǵa oń baǵa berip, QR-men yntymaqtastyqty odan ári nyǵaıtýǵa múddeli ekenin bildirdi.
«Qazaqstanda sońǵy birneshe jylda avıatsııa sektorynda aıtarlyqtaı ilgerileý baıqalady. Júıe qalypty jumys isteıdi, eldiń kórsetkishteri ortasha jahandyq kórsetkishten joǵary. Biz eldiń avıatsııa salasyn odan ári damytýǵa daıynbyz. ICAO basymdyqtarynyń biri – Turaqty damý maqsattary kontekstinde kólikti damytýdy qoldaý. Shyǵaryndylardyń nóldik deńgeıine jetý úshin biz turaqty «jasyl» otyndy kóbirek paıdalanýymyz kerek. Osy baǵytta birlesip jumys isteýge daıynbyz», — dep atap ótti Salvatore Shakkıtano.
Kezdesý qorytyndysy boıynsha taraptar seriktestik baılanystardy jan-jaqty damytý jáne tereńdetý nıetterin rastady.
Osyǵan deıin elimizde azamattyq ushqyshsyz avıatsııany damytýdyń tujyrymdamasy bekitilgeni týraly jazdyq.