IBU sheshimi: Qazaqstan quramasynyń 10 bıatlonshysy nelikten jarystan shettetildi
ASTANA. QazAqparat - Halyqaralyq bıatlonshylar odaǵy IBU Qazaqstan quramasynyń bıatlonshylaryn ýaqytsha shettetý týraly qaýly shyǵardy, dep habarlaıdy QazAqparat tilshisi Qazaqstan bıatlonshylar odaǵynyń resmı saıtyna silteme jasap.
Belgili bolǵandaı, 2017 jyldyń qańtar aıynda bıatlonnan Qazaqstan quramasy Italııanyń Anholts qalasynda ótkizilgen Álem Kýbogynyń kezeńine qatysqan. Sol jyldyń 20 qańtarynda dopıngti qoldandy degen kúdikpen Italııanyń Boltsano provıntsııasynyń polıtsııasy men prokýratýrasy jospardan tys Qazaqstan quramasynyń jattyqtyrýshylary men sportshylarynyń nómirlerine tintý júrgizgen.
«Atalmysh sharaǵa Qazaqstan komandasyna tıesili qoqys konteınerlerine laqtyrylǵan medıkamentter qorapshasy sebep bolyp otyr. Tekserýlerdiń barlyq satysynda dopıngke qatysty barlyq synamalar bizdiń bıatlonshylarda teris nátıjeni kórsetken. Óziniń qaýlysymen Boltsano prokýratýrasy Qazaqstan quramasyna qarsy isti jabý jáne tergeýdi toqtatý týraly ótinim bergen. Qazaqstan quramasy sportshylarynda tyıym salynǵan zattar tabylmaǵan», - delingen habarlamada.
Alaıda 2018 jyldyń 22 qarashasynda Qazaqstan bıatlonshylar odaǵyna 2017 jyldyń qańtaryndaǵy antıdopıngtik iske baılanysty ulttyq quramadaǵy 10 sportshyny ýaqytsha saıystardan shettetý týraly IBU-dyń resmı habarlamasy kelgen.
«Atalmysh qaýlymen Halyqaralyq Bıatlonıster odaǵy IBU atalmysh máseleni birjolata anyqtap, bıatlonnan Qazaqstan quramasyn antıdopıngtik erejelerdiń buzylýyna qatysty aıyptalýy boıynsha isti birjolata jabýdy kózdeıdi. Resmı hatta 9 sportshy jazylǵan. Olar istiń mán-jaıy anyqtalǵansha halyqaralyq saıystarǵa qatysa almaıdy. Olardyń ishinde Galına Vıshnevskaıa, Alına Raıkova, Darıa Klımına, Olga Poltoranına, ıAn Savıtskıı, Maksım Braýn, Anna Kıstanova, Anton Pantov ı Vasılıı Podkorytov bar», - dep habarlandy Qazaqstan Bıatlonshylar odaǵynyń resmı saıtynda.
Qazirgi tańda IBU atalmysh másele boıynsha barlyq túıtkilderdi zerttep jatyr. Tekserý qorytyndysynan keıin árbir sportshyǵa jeke habar beriletin bolady. Kemshilik anyqtalmaǵan jaǵdaıda aıyptaýshy shekteýlerdiń bári de kúshin joıady.
IBU atalmysh másele boıynsha sońǵy sheshim shyǵarǵan kezde bul týraly Qazaqstan bıatlonshylar odaǵyna resmı túrde habarlanatyn bolady.
«Qazirgi tańda bizdiń quramadaǵy 12 sportshy Shvetsııanyń Idre qalasynda IBU-tyń Birinshi Kýbogy kezeńine qatysqaly jatyr. Start 2018 jyldyń 29 qarashasynda bastalady. Bizdiń quramanyń quramynda tórt sportshy bar: olar tizimde kórsetilgen Galına Vıshnevskaıa, Darıa Klımına, Maksım Braýn men Anton Pantov. IBU qaýlysy boıynsha ázirge istiń mán-jaıy anyqtalý ústinde. Joǵaryda atalǵan sportshylar jarystan shettetildi. Al qalǵan segiz sportshy Birinshi jáne odan keıingi IBU Kýbogynyń kezeńderine qatysa alady», - deıdi Qazaqstan bıatlonshylar odaǵynyń prezıdenti Ermek Qızatov.
