IBU Reseı Bıatlonshylar odaǵyn tolyq múshelikke qabyldaýdan bas tartty
ASTANA. QazAqparat - Halyqaralyq bıatlonshylar odaǵy (IBU) Kongresi Reseı Bıatlonshylar odaǵynyń osy uıymdaǵy tolyq músheligin qalpyna keltirý úshin tapsyrǵan ótinishine qarsy daýys berdi. Bul týraly IBU Týıtterde málim etti, dep habarlaıdy «QazAqparat» HAA.
IBU Kongresi Horvatııanyń Porech qalasynda ótip jatyr. 5 qyrkúıekte bastalǵan jıyn 9 qyrkúıekte aıaqtalady.
«IBU Kongresi Reseı Bıatlonshylar odaǵynyń IBU tolyq músheligin qalpyna keltirý úshin tapsyrǵan ótinishine qarsy daýys berdi. Sondyqtan RBO IBU-dyń ýaqytsha múshesi bolyp qala beredi», - delingen habarlamada.
2017 jylǵy RBO-nyń halyqaralyq odaqtaǵy statýsy ýaqytsha múshe deńgeıine tómendetilgen bolatyn. Oǵan reseılik bıatlonshylardyń dopıng daýyna iligýi sebep bolǵan.
