IBSF 2017 jylǵy Álem chempıonaty Sochıden aýystyrylatynyn resmı rastady
ASTANA. QazAqparat - Bobsleı men skeletonnan halyqaralyq federatsııa (IBSF) Sochıde ótýi tıis bolǵan 2017 jylǵy Álem chempıonatyn Reseıden ózge memlekette uıymdastyrý sheshimin shyǵardy.
Bul týraly 13 jeltoqsan kúni uıymnyń resmı saıtynda málim etildi, dep habarlaıdy QazAqparat.
«2017 jylǵy Álem chempıonatyn Sochıden basqa jerge aýystyrý týraly sheshim shyǵaryldy. Jańa oryn aldaǵy taıaý ýaqytta jarııalanatyn bolady. IBSF atqarýshy komıteti osyndaı qıyn ýaqytta mundaı is-sharany Reseıde uıymdastyrmaý aqylǵa qonymdy bolatynyn sezindi», - delingen federatsııa málimetinde.
Atap ótilgendeı, mundaı sheshimniń qabyldanýyna eki sebep túrtki bolǵan: álem elderiniń sportshylary men bapkerleri astarynda negizi bar ma, joq pa - belgisiz aıyptaýlar men sóz tartystarǵa emes, tek sportqa baǵdarlanǵan týrnırge qatysýy tıis; Reseıdiń bobsleı federatsııasy álem chempıonatyna daıyndyqqa úlken kúsh-jiger jumsady, biraq qazirgi jaǵdaılarda týrnırdiń uıymdastyrý komıtetiniń kúsh-jigerin nemese Sochı trassasynyń sapasyn baǵalaý múldem derlik múmkin bolmas edi.
IBSF 13 jeltoqsan kúni Latvııa men Ońtústik Koreıanyń skeletonnan quramalary jarystardyń Sochıde ótýine qarsylyq bildirgenderine qaramastan, 2017 jylǵy Álem chempıonaty Reseıden aýystyrylmaıtynyn málim etken bolatyn.
Bobsleı men skeletonnan Álem chempıonaty 13-26 aqpan aralyǵynda Sochıde ótýi tıis edi.
