Ibrahım kelisimine qosylý sheshiminiń durystyǵyna senimdimin — Prezıdent

QYZYLORDA. KAZINFORM — Ibrahım kelisimine qosylý sheshiminiń durystyǵyna senimdimin. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev aıtty.

— Jalpy, dıplomatııada qate sheshimniń quny sonshalyq joǵary bolǵandyqtan memlekettiń uzaq merzimdi múddelerine orny tolmas zııan keltirýi múmkin. Muny biz óz tájirıbemizden bilemiz. Eger ekonomıkada bir baǵdarlamany nemese tujyrymdamany basqa baǵdarlamalyq qujattarmen almastyrýǵa bolatyn bolsa, ókinishke qaraı, bul bizde jıi kezdesedi, al halyqaralyq sharttarǵa qoıylǵan qoldar, ádette, keri qaıtarýǵa jatpaıdy. Qalammen jazylǵandy baltamen shaýyp tastaı almaısyń, — dedi Prezıdent.

Prezıdenttiń paıymynsha, dıplomatııa — bul ymyraǵa kelýdiń, kelisimniń balamasyz quraly deýge bolady. Biraq qaqtyǵys pen daý-janjalǵa aparatyn jol emes. Kez kelgen qaqtyǵysty eger shynaıy nıet pen tıisti kásibılik bolsa, eńserýge bolady.

— Men Ibrahım kelisimine qosylý týraly sheshim qabyldadym. Mundaı kelisimniń paıda bolýynyń ózi Prezıdent Tramptyń tarıhı konteksti jáne qazirgi saıası shyndyqty tereń túsinýinen týyndaǵan dıplomatııalyq ınnovatsııa. Taıaý Shyǵysta berik beıbitshilik ornatýǵa yqpal etýge baǵyttalǵan Ibrahım kelisimine qosylý týraly qabyldanǵan sheshimniń durystyǵyna senimdimin, — dedi Qasym-Jomart Toqaev.

Budan buryn Prezıdent Toqaev Qazaqstannyń Ibrahım kelisimine ne úshin qosylǵanyn túsindirdi.