Ibrahım Janlyel Air Astana tobynyń bas atqarýshy dırektory qyzmetine kiristi
ASTANA. KAZINFORM – 1 sáýirden bastap Ibrahım Janlyel Air Astana tobynyń bas atqarýshy dırektory (CEO) qyzmetine resmı túrde kiristi.
Kompanııa málimetinshe, Ibrahım Janlyel áýekompanııada uzaq jyldar boıy eńbek etken tájirıbeli basqarýshy. Ol 2017 jyldan beri qarjy jónindegi dırektor qyzmetin atqaryp keldi. Buǵan deıingi 14 jyl ishinde kompanııanyń strategııalyq jáne qarjylyq damýyna eleýli úles qosqan basqarýshylar quramynda boldy.
Sondaı-aq 2024 jyly Air Astana tobynyń úsh qor bırjasynda tirkelýine qatysyp, kompanııanyń halyqaralyq naryqqa shyǵýyna úles qosty.
Jańa qyzmetinde Ibrahım Janlyel operatsııalyq ornyqtylyqty nyǵaıtýǵa, turaqty ósimdi qamtamasyz etýge jáne Air Astana men FlyArystan aıasyndaǵy eki brendti damytý strategııasyn ilgeriletýge basymdyq bermek.
– Air Astana kompanııalar tobynyń Bas atqarýshy dırektory qyzmetin atqarý men úshin úlken mártebe ári jaýapkershilik. Bul – men úshin mańyzdy kezeń ári 7 myń qyzmetkerimiz ben barlyq múddeli tarap úshin sabaqtastyqtyń kórinisi. Kompanııanyń negizin qalaýshy qaǵıdattaryn saqtaý jáne damytý – bizdiń basty mindetimiz, – dedi Ibrahım Janlyel.
Onyń aıtýynsha, kompanııa halyqaralyq deńgeıdegi operatsııalyq, qaýipsizdik jáne qyzmet kórsetý standarttarynyń joǵary deńgeıin qamtamasyz etýdi jalǵastyrady. Sonymen qatar korporatıvtik basqarý júıesin jetildirý jáne kommertsııalyq ári qarjylyq táýelsizdikti nyǵaıtý kózdelip otyr.
Aıta keteıik, Air Astana toby Ortalyq Azııa men Kavkaz óńirinde áýe kemeleri parki men jolaýshylar sany boıynsha kóshbasshy sanalady. Kompanııanyń geografııalyq ornalasýy álem halqynyń edáýir bóligine jaqyn bolýyna baılanysty aldaǵy ýaqytta tranzıttik áleýetti keńeıtýge múmkindik beredi.
– Biz Ortalyq Azııadaǵy habtarymyz arqyly ushatyn jolaýshylar úshin tańdaýly áýe kompanııasy retindegi pozıtsııamyzdy nyǵaıtýdy kózdeımiz, – dedi jańa bas dırektor.
Aıta keteıik, Meıirjan Baıǵonysov Prezıdent Ákimshiligi ınvestıtsııa bóliminiń meńgerýshisi boldy.
