Ibragım Janǵorazov 83 jasqa qaraǵan shaǵynda dúnıeden ótti
KÓKShETAÝ. QazAqparat - Sotsıalıstik Eńbek Eri, Aqmola oblysy men Arshaly aýdanynyń qurmetti azamaty Ibragım Janǵorazov 83 jasqa qaraǵan shaǵynda 15 qańtar kúni dúnıeden ótti, dep habarlaıdy QazAqparat tilshisi Aqmola oblystyq ishki saıasat basqarmasyna silteme jasap.
Aıta keteıik, Ibragım Dáýituly 1937 jyldyń 19 shildesinde týǵan. Qyryq jyldan astam ýaqyt boıy respýblıkamyzdyń qus ósirý salasynyń kósh basyndaǵy ujymdy basqaryp keldi. Odan basqa, «Ijevskıı» ÓK - óńirdegi bıdaı óndirýdiń flagmany, kásiporyn mal sharýashylyǵymen tanymal bolǵan.
Ibragım Dáýituly elimizdiń, Aqmola oblysynyń áleýmettik-ekonomıkalyq damýyna eleýli úles qosty. Bar ómirin agrarly salaǵa arnaǵan ol naryqtyq ekonomıka jaǵdaıynda ónimdiligi joǵary kásiporyn uıymdastyrýda úlken jetistikterge jetti.
Ibragım Dáýituly - Sotsıalıstik Eńbek Eri, Aqmola oblysy men Arshaly aýdanynyń qurmetti azamaty, «Ijevskıı» ÓK bas dırektory, Qazaqstan Respýblıkasy Aýyl sharýashylyq akademııasynyń akademıgi, sondaı-aq, «Parasat», «Otan» tárizdi birneshe medaldardyń ıegeri. Qazaqstannyń qus ósirýshiler odaǵynyń qurmetti prezıdenti, Qurmetti qus ósirýshi, QR Eńbegi sińgen aýyl sharýashylyǵy qyzmetkeri, I.Baraev atyndaǵy memlekettik syılyqtyń laýreaty, Qazaqstan halqy Assambleıasynyń múshesi.
«Ol - elimizdiń jáne Aqmola oblysynyń maqtanyshy» deıdi oblystyq ishki saıasat basqarmasyndaǵylar.
