Ibragım Eskendir 30 jeltoqsan kúni kásipqoı bokstaǵy ekinshi jekpe-jegin ótkizedi
ASTANA. QazAqparat - Qazaqtyń án áleminde «Kók týdyń jelbiregeni» ánimen tanylǵan Ibragım Eskendir 30 jeltoqsan kúni kásipqoı bokstaǵy ekinshi jekpe-jegin ótkizedi, dep habarlaıdy Qazaqparat tilshisi.
Bul týraly ol QazAqparat tilshisine bergen shaǵyn suhbatynda aıtyp ótti.
- Ibragım, sizdi 30 jeltoqsan kúni kásipqoı bokstaǵy ekinshi aıqasyn ótkizedi dep estidik.
- Iá, sátin salsa, ekinshi ret rıngke shyǵýǵa daıyndyqty bastap kettim.
- Ol jekpe-jek qaıda ótedi? Qarsylasyńyz kim?
- Ózderińiz bilesizder, 30 jeltoqsan kúni Almatyda qazaqstandyq kásipqoı boksshy qaryndasymyz Fırýza Sháripova kezekti aıqasyn ótkizedi. Mine, osy boks keshi aıasynda men de óner kórsetetin boldym. Biraq, ázirge qarsylasymnyń naqty kim bolatyny belgisiz. Buıyrsa, aldaǵy aptada belgili bolyp qalady.
- Birinshi jekpe-jegińiz týraly aıta ketseńiz?
- Alǵashqy aıqasymdy Reseı astanasy Máskeý tórinde ótkizdim. Allanyń qýatymen jeńiske jettim.
- Ózińiz de sol kezde jeńiske degen senim basym boldy ma, álde qobaljý basym boldy ma?
- Rıngke shyqqanǵa deıin qobaljý boldy. Tipti, salmaq joǵaltyp aldym desem de bolady. Biraq, «Kók týdyń jelbiregeni» ánin áýelete qoıyp tastap, sharshy alańǵa bettegende rýhtanyp kettim. Alǵashqy úreıimniń barlyǵy umyt boldy. Qarsylasyma qalaı ash qasqyrdaı umtylǵanymdy da bilmeı qaldym. Qazaqtyń qany, qazaqtyń jany erlik pen jigerge toly ekenin sondaıda sezinedi ekensiń...
- Jeńisten keıingi áserińizben bólise alasyz ba?
- Boıymdy bir alapat kúsh kernep turdy. Ózimdi qazaq degen batyr eldiń balasy ekenimdi sezindim.
- Endi aldaǵy ýaqytta rıng pen sahnanyń qaısysyn janyńyzǵa jaqynyraq ustaısyz?
- Bokstan bir ataq alyp ketý oıym bar. Al sahna ol men úshin máńgilik.
- Áńgimeńizge rahmet!
