IBNS ekinshi jyl qatarynan Qazaqstan teńgesin jyldyń úzdik banknoty dep tanydy
Atap aıtqanda, dızaıny ózgergen 5 000 teńgelik Qazaqstan banknoty «2012 jyldyń úzdik banknoty» ataldy. Bul týraly QR Ulttyq bankiniń baspasóz qyzmetinen habarlandy.
IBNS 2012 jyly búkil álem boıynsha shyǵarylǵan júzge jýyq jańa banknottyń ishinen Qazaqstan banknotyn jeńimpaz retinde tańdaı otyryp, kýpıýranyń dızaıny men ıdeologııasyn, sol sekildi onyń tehnıkalyq turǵydan oryndalýy men qorǵalýyn úzdik dep tanydy.
Toqtala ketetin jaıt, Halyqaralyq banknot qoǵamdastyǵy dúnıe júzinen banknot jınaýshylardyń táýelsiz birlestigi bolyp tabylady. Olar jyl saıyn ózderiniń theibns.org. saıtynda ınternet-daýys berý arqyly jyldyń úzdik banknotyn aıqyndaıdy.
Jeńimpaz qazaqstandyq 5 000 teńgelik banknot 2011 jylǵy 30 jeltoqsanda shyǵarylǵan. Teńgeniń dızaınyn Qazaqstan Respýblıkasy Ulttyq bankiniń dızaınerleri jasady, ol Qazaqstan Ulttyq bankiniń Banknot fabrıkasynda basyp shyǵaryldy.
Banknottyń dızaıny 2006 jylǵy banknottardyń dızaıny sııaqty basym qyzyl túske ıe, biraq oǵan qaraǵanda barynsha ashyq jáne qanyq. Bet jaǵyndaǵy beıneleri negizinen tiginen, syrt jaǵynda kóldeneń ornalasqan. Bet jaǵynda «Qazaq Eli» monýmentiniń sýreti ornalasqan, ol Astana qalasynyń on jyldyq mereıtoıy qarsańynda ashyldy jáne Qazaqstan táýelsizdigin beıneleıdi. Banknottyń tómengi oń bóliginde úılesimdi, beıbitshilik pen kelisimdi bildiretin ushyp júrgen kepterler beınelengen. Syrt jaǵynda Qazaqstan kartasynyń pishini, aldyńǵy jaǵynda Іle Alataýy aıasyndaǵy, Almaty qalasynda ornalasqan Táýelsizdik monýmentiniń shyńy, «Qazaqstan» qonaq úıiniń ǵımaraty ornalasqan.
Toqtala ketetin jaıt, Qazaqstan banknottary osyǵan deıin de beldi halyqaralyq nagradalarmen marapattalǵan bolatyn. Máselen, 2007 jyly Qazaqstan Respýblıkasy Ulttyq bankiniń banknottarynyń jańa serııasy Halyqaralyq valıýta qaýymdastyǵy (IACA) taǵaıyndaǵan «Jyldyń úzdik jańa serııasy úshin» júldeni jeńip aldy. Sonymen qatar, sol jyly Bangkokta «Optiks» elementi bar nomınaly 10 000 teńgelik banknot «Eń úzdik jańa banknot» nomınatsııasynda birinshi orynǵa ıe boldy. Al 2008 jyly Teńgeniń 15 jyldyǵyna arnalǵan 2008 jylǵy úlgidegi 5000 teńgelik banknotta «SPARK» qorǵanysh elementi banknottardy qorǵaýda eń úzdik ınnovatsııa dep tanyldy. 2011 jyly Qazaqstan Táýelsizdiginiń 20 jyldyǵyna arnalǵan nomınaly 10 000 teńgelik eskertkish banknot IBNS konkýrsynyń qorytyndylary boıynsha «2011 jyldyń úzdik banknoty» dep tanylǵan edi.
