Ybyraı Jaqaevtyń kóp qural-saımany aýyl ustasynyń qolynan shyqqan
QYZYLORDA. KAZINFORM — «Aq kúrishtiń atasy» atanǵan eki márte Sotsıalıstik Eńbek Eri Ybyraı Jaqaev tutynǵan zattar Qyzylorda oblysynyń Shıeli aýdanyndaǵy ózimen attas aýyldaǵy mýzeıde saqtaýly tur.
Dańǵaıyr dıqannyń nemeresi Aıagóz Jaqaeva osynda qor saqtaýshy bolyp jumys isteıdi. Aıtýynsha, mýzeı 1982 jyly ashylǵan.
Onda kúrishshiniń 1964 jyly oblys jastaryna arnap jazǵan úndeý haty, hat negizinde jaqaevshylar qozǵalysynyń qurylý kezeńi ekspozıtsııalanǵan.
Oblys kólemindegi izbasarlary jáne eńbek maıtalmandarynyń jetistikterimen, jaqaevshy jastardyń ekpindi eńbegimen tanysýǵa bolady.
Sonymen qatar jergilikti qolóner sheberleriniń, óner ıeleriniń buıymdary, ata-babalarymyz salt-dástúrge baılanysty tutynǵan turmystyq zattar bar, uzyn sany 11 myńnan astam eksponat qoıylǵan.
Aıagóz Jaqaeva onyń ishinde dańqty kúrishshi Syr salysyn baptap, ósirý kezinde qoldanǵan birneshe qural-saımannyń tarıhyna erekshe toqtaldy.
— Atamyz egis basynda ózi ustaǵan ketpen bar. Kólemi — d-35 sm, metaldan jasalǵan. Úlken ári aýyr. Kelýshiler úlkendigine qatty tańǵalady. Al egin, shóp orý úshin paıdalanǵan oraǵynyń qol saby aǵashtan, ıilip metaldan quıylyp jasalǵan. Eńbek quralynyń bıiktigi — 41,5 sm, eni — 33 sm. Endigi bir erekshe dúnıe — baıtesemen Ybyraı atamyz kúrishtiń arasynda ósken sheńgel, aramshópti shapqan eken. Uzyndyǵy — 22 sm, eni — 5 sm. Qural-saımanyn túgel bizdiń aýylda, ıaǵnı burynǵy Qyzyltý kolhozynda turǵan usta Seıtimhan Sahıev qoldan soqqan. Ybyraı atanyń urpaqtary olardy mýzeıge 1982 jyly syıǵa tartqan, — dedi qor saqtaýshy.
Mýzeıden Y.Jaqaev at ústin salǵan er turmandy da keziktiremiz. Ol teri men metaldan jasalyp, shegelengen.
Buǵan deıin biz qurylǵanyna bıyl 40 jyl tolǵan, Shoqan Ýálıhanovtyń balalyq shaǵy ótken SQO-daǵy mýzeıge saıahat jasaǵanbyz.
