Ybyraı Altynsarın atyndaǵy Ulttyq bilim akademııasynyń prezıdenti taǵaıyndaldy
ASTANA. KAZINFORM — Oqý-aǵartý mınıstriniń buıryǵymen Názıpa Aıýbaeva Ybyraı Altynsarın atyndaǵy Ulttyq bilim akademııasynyń prezıdenti laýazymyna taǵaıyndaldy. Bul týraly Oqý-aǵartý mınıstrliginiń baspasóz qyzmeti habarlady.
Ulybrıtanııadaǵy Kembrıdj ýnıversıtetiniń Bilim berý fakýltetinde fılosofııa doktory (PhD) jáne fılosofııa magıstri (MPhil) dárejelerin, Úndistandaǵy Bangalor ýnıversıtetinde marketıng jáne júıeler mamandyǵy boıynsha iskerlik basqarý magıstri (MBA) dárejesin, sondaı-aq Bishkektegi Joǵary kolledjde pedagogıka jáne lıngvıstıka mamandyǵy boıynsha bakalavr dárejesin alǵan.
Eńbek jolyn Taraz qalasyndaǵy №39 orta mektepte aǵylshyn tili pániniń muǵalimi bolyp bastaǵan. Almaty qalasyndaǵy Abaı atyndaǵy respýblıkalyq daryndy balalarǵa arnalǵan mamandandyrylǵan mektep-ınternatynda álem ádebıeti jáne fılosofııa pánderinen arnaıy kýrs júrgizgen. Narhoz ýnıversıteti men Qazaq ulttyq qyzdar pedagogıkalyq ýnıversıtetinde qaýymdastyrylǵan professor qyzmetin atqarǵan.
Ár jyldary «Nazarbaev Zııatkerlik mektepteri» derbes bilim berý uıymy tóraǵasynyń orynbasary, «Nazarbaev Qory» tóraǵasynyń orynbasary, Nazarbaev Ýnıversıteti Joǵary bilim berý mektebiniń aǵa ǵylymı qyzmetkeri jáne Qazaqstan Respýblıkasy Úkimeti men Ulttyq Banki janyndaǵy «Ulttyq analıtıkalyq ortalyq» aktsıonerlik qoǵamynyń jobalar menedjeri qyzmetterin atqarǵan.
Názıpa Altynbekqyzy Eýropalyq komıssııa, Amerıkalyq halyqaralyq damý agenttigi (USAID) jáne Dúnıejúzilik saýda ınstıtýtynyń (WTI) aımaqtyq jobalaryn basqarý salasynda mol tájirıbe jınaqtaǵan. Bilim salasyndaǵy zertteýshilerdiń Qazaqstandaǵy qaýymdastyǵynyń (KERA) negizin qalaýshylardyń biri jáne Eýropadaǵy bilim salasyn zertteýshiler qaýymdastyǵynyń belsendi múshesi bolyp tabylady.
«Ǵylymdy damytýǵa sińirgen eńbegi úshin» tósbelgisimen marapattalǵan.
Ybyraı Altynsarın atyndaǵy Ulttyq bilim akademııasynyń prezıdentin ujymǵa tanystyra otyryp, Oqý-aǵartý mınıstri Ǵanı Beısembaev uıymnyń halyqaralyq mártebesin arttyrýǵa baǵyttalǵan birqatar naqty mindetter qoıdy.
Aıta ketelik elimizde apta ishinde bolǵan kadrlyq taǵaıyndaýlar týraly jazǵan edik.
Aıta keteıik, saıasat, ekonomıka, bıznes, ǵylym, mádenıet sekildi túrli salada el damýyna eleýli úles qosqan tanymal qazaqstandyqtardyń ómirbaıany men qyzyqty málimetterdi myna jerden oqı alasyz.