IBF-tiń úmitkeri GGG-men bokstasýǵa daıyn

ASTANA. QazAqparat - Orta salmaqtaǵy IBF belbeýinen mindetti úmitker Sergeı Derevıanchenko atalǵan tıtýldyń ıegeri Gennadıı Golovkınmen judyryqtasýǵa daıar, dep xabarlaıdy QazAqparat tilshisi.

«Bilýimshe, qazirgi kezde Golovkın demalyp júr. Odan keıin olar Alvareske qarsy ekinshi jekpe-jekti ótkizýdi kózdeıdi. Bul jerde kóp nárse pomoýterlerge baılanysty ǵoı», - dedi ýkraınalyq boksshy Derevıanchenko Sports.kz saıtyna bergen suxbatynda.

Onyń oıynsha, Golovkın jyldam boksshylarmen durys bokstasa almaıdy. Sebebi olar shapshań, ondaı boksshylardy qýa bergennen kúsh sarqylady. «Máselen, Djeıkobsqa qarsy jekpe-jekte Golovkın úshin qarsylasyn qýa bergen ońaı emes ekeni baıqaldy. Al adam bir jerde tura berse, qatty soqqyny darytý jeńil», - dep atap kórsetti Derevıanchenko. Óz sózinde boksshy Golovkınge qarsy jekpe-jekti Qazaqstanda ótkizýge qarsy emes ekenin jetkizdi.

Aıta keteıik, kezinde Sergeı Derevıanchenko «Astana arlandary» sapynda da óner kórsetken.