IBF reıtınginde eki qazaqstandyq boksshy úzdikter qatarynda tur
ASTANA. KAZINFORM – Halyqaralyq boks federatsııasy (IBF) aqpan aıyndaǵy úzdik kásipqoı boksshylardyń jańartylǵan reıtıngisin jarııalady.
IBF Qazaqstannyń eki boksshysyn tizimge engizdi. Kishi jeńil salmaqta qazaqstandyq Sultan Zaýrbek resmı túrde úshinshi orynǵa jaıǵasqan, alaıda onyń aldyndaǵy birinshi jáne ekinshi oryndar bos bolǵandyqtan, is júzinde ol birinshi orynda tur.
Bul salmaqtaǵy IBF tujyrymy boıynsha álem chempıony – meksıkalyq Emanýel Navarrete.
Orta salmaqta qazaqstandyq Jánibek Álimhanuly IBF tujyrymy boıynsha álem chempıony bolyp tirkelgen. Bul reıtıng dopıngke qatysty tergeý nátıjesinde IBF onyń tıtýlynan aıyrý týraly sheshim qabyldamaǵanyn kórsetedi. Álimhanulynyń menedjeri Berik Sultan buǵan deıin IBF sportshyǵa qatysty sheshimdi naýryz aıynyń basynda qabyldaıdy dep habarlaǵan bolatyn. Alaıda, qazirgi ýaqytta IBF tek reıtıngini jańartýmen shektelip, naqty málimdeme jasaǵan joq.
Aıta keteıik, Álimhanuly qazirgi ýaqytta álem chempıony ataǵyn ıelenetin taǵy bir uıym WBO nusqasy boıynsha dıskvalıfıkatsııalanǵan.
Budan buryn habarlaǵanymyzdaı, Jánibek Álimhanuly IBF álem chempıony tıtýlyn saqtap qaldy.
