IBA nusqasy boıynsha ótetin bokstan álem chempıonatyna Qazaqstannan kimder barady

ASTANA. KAZINFORM – Qazaqstan quramasy Halyqaralyq olımpıada komıteti moıyndamaǵan IBA uıymy ótkizetin boks boıynsha álem chempıonatyna qatysady.

IBA týrnıri 3-13 jeltoqsan aralyǵynda Dýbaıda uıymdastyrylady. Bul básekede 13 salmaq dárejesi belgilengen, al júlde qory óte joǵary: chempıondar – 300 myń dollar, kúmis júldegerler – 150 myń dollar, qola júldegerler – 75 myń dollar, al shırek fınalıster 10 myń dollar alady.

Qazaqstan quramasynyń sapynda bıyl kúzde World Boxing halyqaralyq federatsııasy ótkizgen, ýaqytsha HOK moıyndaǵan álem chempıonatynyń jeńimpazdary bolmaıdy. Sebebi World Boxing – 2028 jylǵy Olımpıada oıyndaryndaǵy boks básekesine jaýapty uıym.

Degenmen IBA týrnırine qatysatyn ulttyq quramany tájirıbeli boksshylar Temirtas Júsipov pen Sáken Bıbosynov kúsheıtip otyr. Olar 2021 jyly IBA uıymdastyrǵan álem chempıonatynda jeńimpaz atanǵan bolatyn, ol kezde World Boxing áli qurylǵan joq edi.

IBA álem chempıonatyna baratyn Qazaqstan quramasynyń tizimi:

48 kg – Temirtas Júsipov
51 kg – Danııal Sábıt
54 kg – Sáken Bıbosynov
57 kg – Orazbek Asylqulov
60 kg – Serik Temirjanov
63,5 kg – Ertýǵan Zeınýllınov
67 kg – Sanatáli Tóltaev
71 kg – Abylaıhan Júsipov
75 kg – Sabyrjan Aqqalyqov
81 kg – Erasyl Jaqpekov
86 kg – Dáýlet Tólemisov
92 kg – Nurmuhamed ıÝsýpov
+92 kg – Nurlan Saparbaı

Eske salaıyq, World Boxing uıymynyń jańa prezıdenti, qazaqstandyq Gennadıı Golovkın sportshylardyń World Boxing ári IBA týrnırlerine qatysý múmkindigi jóninde zańdyq jaǵyn zerttep jatqanyn málimdegen edi. Ol árqashan boksshylardyń múddesin qorǵaıtynyn, olardyń jaqsy jaǵdaıǵa ıe bolýyn basty maqsat sanaıtynyn atap ótti.

Aıta keteıik, Jánibek Álimhanuly úsh belbeý úshin ótetin jekpe-jek aldynda jankúıerlerine ýáde berdi.