IACA basylymynda Qazaqstanda sot ákimshiligin damytý týraly maqala jarııalandy
Halyqaralyq sot ákimshiligi qaýymdastyǵynyń (IACA) resmı basylymynda osy uıymnyń prezıdenti Lýıs Marııa Palmanyń Qazaqstandaǵy reformalarǵa sholý jasaǵan jáne sot ákimshiligi salasyndaǵy jetistikterge arnalǵan «Qazaqstandaǵy sot ákimshiligi: jetistikter men perspektıvalar» atty maqalasy jarııalandy, dep habarlaıdy Kazinform.
Býenos-Aıres ulttyq ýnıversıtetiniń professory, Gaagadaǵy (Nıderlandy) Halyqaralyq Sot tóreligi salasyndaǵy ozyq tájirıbe ınstıtýtynyń (IIJE) dırektory L.Palma bıylǵy maýsym aıyndaǵy saparynyń qorytyndylary boıynsha Qazaqstandaǵy ózgerister týraly áńgimelegen.
Ol budan buryn, 2019 jyly IACA halyqaralyq konferentsııasynyń qatysýshysy retinde Astanada bolǵan bolatyn.
Onyń pikirinshe, oqytý, sot tóreligine qoljetimdilik, basqarý, ınfraqurylym, normatıvtik aktiler men yntymaqtastyq salalarynda qysqa merzimde áserli reformalar júrgizilgen.
«2023 jyldyń basyna qaraı Qazaqstannyń sot júıesindegi basqarý reformasynyń sheshýshi jáne serpindi sáti Qazaqstan Prezıdentiniń jańa táýelsiz ortalyq organ – Qazaqstan Respýblıkasynyń Sot ákimshiligin qurý týraly sheshimi boldy», - dep jazady L. Palma.
Ózi kórip, zerttegen Qazaqstan Respýblıkasynyń jetistikteriniń ishinde Lýıs Palma mynany atap ótken:
- sot júıesiniń táýelsiz bıýdjeti;
- aýmaqtan tys sottylyq boıynsha isterdi avtomattandyrylǵan bólý;
- tsıfrlandyrýdy damytýdyń joǵary deńgeıi jáne sot tóreligine qoljetimdilik;
- sot isin júrgizýde jasandy ıntellekt jáne robottandyrý elementterin qoldaný.
Qorytyndylaı kele, HSÁQ-nyń prezıdenti sot tóreliginiń sapasy men tıimdiligin arttyrýǵa yqpal etetin bul jetistikterdi tamasha jáne jigerlendiretin jetistikter dep ataǵan.
Qazaqstan turǵyndardyń sotqa tsıfrlyq qoljetimdiligi boıynsha álemde 4-shi orynda (2021 jylǵy málimetter boıynsha).
Maqalamen myna silteme arqyly tanysýǵa bolady.
