IAAF qurlyqtyq kýbogynda Rypakova men Zıabkına baq synaıdy
ASTANA. QazAqparat - 8-9 qyrkúıek kúni Chehııanyń Ostrava qalasynda IAAF qurlyqtyq kýbogynyń úshinshi kezeńi ótedi. Halyqaralyq jeńil atletıka federatsııasy tórt jylda bir ret uıymdastyratyn dodaǵa Olga Rypakova men Vıktorııa Zıabkına shaqyrtý aldy, dep jazady Olympic.kz.
Atalǵan jarysqa Eýropa, Amerıka, Afrıka jáne Azııa-Okeanııa aımaǵynyń quramalary qatysady. Týrnır baǵdarlamasyna 37 sport túri engen. Erler men áıelderdiń árqaısysy 18 báseke túrinen synǵa túsedi. Sondaı-aq, 400 metrge 4 adamnan jarysatyn aralas komandalyq estafeta bar.
Jeńimpaz komanda upaı sanynyń kóptigimen anyqtalady. Bir aıta keterligi, munda sportshylardyń jeke kórsetkishi emes, birlesken reıtıngi esepke alynady.
Ár qurlyq quramalary osy maýsymdaǵy iri jarystardyń nátıjesi boıynsha jasaqtaldy. Azııa men Okeanııanyń birikken komandasyna 87 atlet engen (45 er adam, 42 áıel). Olardyń arasynda qazaqstandyq Vıktorııa Zıabkına (200 m) men Olga Rypakova (úsh qarǵyp sekirý) bar.
Maýsym aıynda ótken Ǵusman Qosanov memorıalynda 200 metrdi 22.73 sekýndta júgirip ótken Zıabkına Azııa reıtınginde kósh bastap tur. Sondaı-aq, Jakartadaǵy Azııa oıyndarynda 14.26 metrge sekirgen Rypakova tizimde birinshi orynda.
