І jartyjyldyqta astyq eksporty 12 mln. tonnadan asty
ASTANA. 27 tamyz. QazAqparat - Qazaqstanda aýylsharýashylyǵy ónimderiniń eksporttyq áleýetin arttyryp, eldiń azyq-túlik qaýipsizdigin qamtamasyz etýge baǵyttalǵan agroónerkásip keshenin damytýdyń 2010-2014 jyldarǵa arnalǵan Baǵdarlamasy júzege asyrylýda.
2012 jyldyń І jartyjyldyǵynyń qorytyndysy boıynsha astyqty eksportqa shyǵarýdyń úlesi rekordyq kórsetkish - 12,1 mln. tonnaǵa jetken, dep habarlaıdy Pm.kz saıty.
QR Aýyl sharýashylyǵy mınıstrliginiń málimetterine qaraǵanda, ústimizdegi jyly astyq eksporty rekordyq kórsetkish - 12,1 mln. tonnaǵa jetken, onyń ishinde bıdaı túrinde eksportqa shyǵarylǵany - 8,4 mln. tonna, un - 2,6 mln. tonna. Jyl basynan beri eksportqa 7,5 mln. tonnadan artyq astyq tıelgen.
Eksport kólemin ulǵaıtý eksportshylardyń astyqty Reseı Federatsııasy jáne Qytaı Halyq Respýblıkasy arqyly jóneltýiniń kólik shyǵynyn sýbsıdııalary arqyly, sondaı-aq kóktemgi dala jumystary men aýyl sharýashylyǵy tehnıkasyn daıyndaýdyń ýaqytyly júrgizilýimen múmkin bolǵanyn aıta ketý kerek.
2011 jyldyń qyrkúıeginen 2012 jyldyń naýryzyna deıingi aralyqta 2,5 mln. tonna astyq sýbsıdııalandy. Taǵy da 3,75 mln. tonna astyqty sýbsıdııalaýǵa qarajat bólý josparlanýda.
Budan basqa, ústimizdegi jyly aýyl sharýashylyǵynyń egis alqaptary ótken jylmen salystyrǵanda 1,4%-ǵa artyp, 21,5 mln. ga qurady. Sonymen qatar, 2012 jyly dándi daqyldar egisitik alqabynda 76,7% ylǵal resýrsyn saqtaıtyn tehnologııa qoldanyldy.
Azyq-túlikpen qamtamasyz etýge keletin bolsaq, 2012 jyldyń qańtar-maýsym aılarynda azyq-túlik óndirisi kólemi 5,9% artyp, 359,1 mlrd. teńgeni quraǵan. Un óndirisi 31,1%, suıyq maı 43,6%, jarma 6,6%, kondıterlik ónimder 5,8%, shujyq ónimderi 18%, et jáne et-ósimdik konservileri 89,6 % artty.
AÓK damytý baǵdarlamasy QR Prezıdentiniń «Qazaqstan Respýblıkasyndaǵy údemeli ındýstrııalyq ınnovatsııalyq damýdyń 2010-2014 jyldarǵa arnalǵan memlekettik baǵdarlamasy týraly» Jarlyǵyna sáıkes ázirlengen. Ony júzege asyrý eldiń agrarlyq ekonomıkasyn jańa sapalyq deńgeıge kóterip, onyń básekege qabilettiligin arttyrady.
