І jartyjyldyqta 51 myńnan astam qazaqstandyq «Jumyspen qamtý-2020» baǵdarlamasymen qamtyldy
dep habarlady pm.kz saıty.
Eńbek jáne halyqty áleýmettik qorǵaý mınıstrliginiń aqparaty boıynsha, І jartyjyldyqta 59 myńǵa jýyq adam óńirlik jumyspen qamtý ortalyqtaryna júgindi, olardyń 51-i myńy qatysýshy atanyp, olarmen áleýmettik kelisimsharttar jasaldy jáne 6,6 myńdaı adam qosymsha oqýsyz bos jumys oryndaryna turǵyzyldy.
«Baǵdarlamaǵa qatysýshylardyń, áleýmettik kelisimshartqa qol qoıǵandardyń ishinde 38 105 adam - jumyssyzdar jáne olardyń 54 paıyzy - 29 jasqa deıingi jastar bolsa, 47,6 paıyzy - áıel azamattar», - dep habarlady Eńbek mınıstrliginiń baspasóz qyzmetinen pm.kz saıtyna.
Jumyspen qamtý baǵdarlamasynyń І baǵyty boıynsha 49,3 myńnan astam qazaqstandyq 442 bilim uıymynda oqyp jatyr. 21,6 myń adam - áleýmettik jumys oryndaryna, 11,5 myń adam - jastar tájirıbesine joldama aldy. Olardyń ortasha jalaqysy 45,5 myń teńgeni quraıdy.
Al aýyldyq jerlerdegi kásipkerlikke qoldaý kórsetýdi maqsat etken ІІ baǵyt boıynsha 2096 adam shaǵyn nesıe alyp otyr. 3211 adam kásipkerlerlik negizderin oqyp-úırendi jáne shaǵyn nesıe alǵan kásipkerler búginde aýyldyq jerlerde 2 684 jumys ornyn ashqan.
Aıta ketý kerek, mal sharýashylyǵy, et ónimderiniń óndirisi, kókónis jáne baqsha ónimderin ósirý sharýashylyǵy aýyldaǵy kásipkerlikti damytýdyń negizgi baǵyttary bolyp otyr, berilgen barlyq nesıelerdiń 74 paıyzyn osy sharýashylyqtar qamtyp otyr.
Eńbek resýrstarynyń jınaqylyǵyn arttyrýdy qarastyrǵan ІІІ baǵyttyń aıasynda el óńirlerinde 564 úıdiń qurylysy jalǵasýda, 331 úıdiń qurylysy aıaqtaldy. 2012 jyly 229 úıdiń qurylysy josparlanyp otyr jáne búgingi tańda 30 úıdiń qurylysy aıaqtaldy, taǵy 25 úıdiń qurylysy bastaldy. 174 úı boıynsha konkýrstyq rásimder júrgizilýde. Qonys aýdarǵan otbasylardyń kóshi-qondaryna demeýqarjy berildi.
Aýyldyq eldi mekenderdi damytýǵa negizdelgen IV baǵyttyń aıasynda áleýmettik-ekonomıkalyq damý áleýetteri ortasha jáne joǵary aýyldarda ınfraqurylymdyq jobalardy iske asyrý jumystary júrgizilýde. Osy sharalardyń arqasynda 2012 jyly aýyldyq jerlerde 8 myńnan astam qosymsha jumys orny qurylady.
Atap aıtqanda, aǵymdaǵy jyly 565 ınfraqurylymdyq jobany iske asyrý josparlanyp otyr. Onyń ishinde, 309 joba - áleýmettik ınfraqurylymnyń, 138 - ınjenerlik-kólik ınfraqurylymynyń jobalary. Sondaı-aq aýyldardy abattandyrý jáne kommýnaldyq nysandardy jóndeý jobalary da iske asyrylady. 336 joba boıynsha memlekettik satyp alý rásimderi ótkizilip, jumystar bastalyp ketti, aýyldyq jerlerde qazirdiń ózinde 1,2 myń jumys orny qurylyp otyr.
«Jumyspen qamtý-2020» baǵdarlamasyn ári qaraı jalǵastyrý halyqtyń eńbek belsendiligin arttyryp, turmys-tirshiligin jaqsartýǵa baǵyttalǵan basymdyqty mindet bolyp qala beredi.