І jartyjyldyqta 400 myńdaı qazaqstandyq emhana tańdaý quqyǵyn paıdalandy
ASTANA. 9 tamyz. QazAqparat - «Salamatty Qazaqstan» baǵdarlamasynyń aıasynda elimizde medıtsınalyq qyzmet kórsetýdiń sapasyn jaqsartýǵa baǵyttalǵan Biryńǵaı ulttyq densaýlyq saqtaý júıesin engizý jalǵasýda, dep habarlady pm.kz saıty.
«Salamatty Qazaqstan» baǵdarlamasyn QR Úkimeti Elbasy júktegen mindetterdiń aıasynda iske asyrýda. Biryńǵaı ulttyq densaýlyq saqtaý júıesiniń negizgi qaǵıdalarynyń biri naýqastyń statsıonardy erkin tańdaý quqyǵyn iske asyrý bolyp tabylady. QR Densaýlyq saqtaý mınıstrliginiń aqparaty boıynsha, І jartyjyldyqta aýrýhanalarǵa jatqyzylǵan naýqastardyń 34 paıyzy nemese 391 myńnan astam adam ózderiniń emhana tańdaý quqyqtaryn paıdalanǵan jáne olardyń 46 paıyzy - aýyl turǵyndary.
Óz meken-jaılary boıynsha naýqastardyń 92,5 paıyzy emdelse, 1,7 paıyzy - basqa óńirlerge baryp emdelgen, al 5,8 paıyzy - respýblıkalyq emhanalarda mamandandyrylǵan kómek alǵan. Oǵan qosa, naýqastardyń 84 paıyzy aýrýhanaǵa jatý kezekterin 10 kúnge deıin kútse, 16 paıyzy ǵana kezekterin 10 kúnnen asa kútken.
Aıta ketý kerek, elimizdiń barlyq óńirlerinde emdeý men dıagnostıkalaýdyń ınnovatsııalyq tehnologııalary engizilýde. Ótken jartyjyldyqta óńirlik deńgeıde joǵary bilikti medıtsınalyq kómek alǵan naýqastardyń sany 3 esege ulǵaıyp, 8910 adamdy qurady.
Oǵan qosa, 2012 jyly alǵash ret emdeý faktileri boıynsha shyǵyndy naqty óteýdi qarastyrǵan klınıkalyq-shyǵyndy toptar boıynsha tólem jasaý júıesi engizilip otyr. Statsıonarlyq jáne statsıonarlyq-almastyrý qyzmetteriniń tólem tarıfine medıtsınalyq mamandardyń biliktilikterin jetildirý maqsatynda 1,1 mlrd. teńge qarjy qosylyp otyr. Bul qarjyǵa ár medıtsınalyq uıym qyzmetkerleriniń 20 paıyzy biliktilikterin jetildiretin bolady.
Densaýlyq saqtaý mınıstrliginen habarlaǵandaı, aǵymdaǵy jyldyń sońyna deıin arnaıy oqytylǵan 64 jattyqtyrýshy statsıonarlardyń 535 mamanyn jáne bastapqy medıtsınalyq-statsıonarlyq járdem qyzmetteriniń 244 mamanyn oqytady.
Oǵan qosa, medıtsınalyq onkologııalyq kómektiń tólem qaǵıdasy da ózgertilip otyr, budan bylaı onkologııalyq naýqas úshin keshendi tarıf boıynsha tólem jasaý qarastyrylyp otyr. Tegin medıtsınalyq kómektiń kepildik berilgen kóleminiń aıasynda onkologııalyq naýqastarǵa medıtsınalyq kómek kórsetýge 2012 jyly barlyǵy 23 131,5 mln. teńge bólinip otyr, bul ótken jylǵy kórsetkishten 1,7 esege kóp.
Biryńǵaı ulttyq densaýlyq saqtaý júıesiniń aıasynda qarastyrylǵan kelesi jańalyq - ambýlatorlyq-emhanalyq kómek úshin jan basyna shaqqandaǵy normatıv boıynsha keshendi tarıf engizý bolyp tabylady. Tólemniń bul túri 2012 jyldyń 1 shildesinen bastap ilki joba retinde 15 uıymnyń bazasynda engizildi.
Jalpy alǵanda, joǵary atalǵan is-sharalardyń barlyǵy memlekettik densaýlyq saqtaý uıymdarynyń derbestigin arttyrýǵa, olardy jańartýǵa jáne medıtsınalyq qyzmetterdiń sapasyn arttyrýǵa, sondaı-aq Qazaqstannyń densaýlyq saqtaý júıesiniń básekege qabilettigine baǵyttalyp otyr.
