І-jartyjyldyq qorytyndysy: Munaı eksporty 6 paıyzǵa artty

ASTANA. QazAqparat - Elimizde bir aıǵa jetetin janar-jaǵarmaı qory bar. Bul týraly búgin Úkimet otyrysynda QR Energetıka mınıstri Qanat Bozymbaev  aıtty, dep habarlaıdy QazAqparat tilshisi. 

«Aǵymdaǵy jyldyń І-jartysynda otyn-energetıka salasynda oń dınamıka jalǵasyn tapty. Munaı jáne kondensat óndirý kólemi 45,2 mln tonnany qurady. ıAǵnı, 2017 jyldyń sáıkes kezeńimen salystyrǵanda 6 paıyzdan asa ósim kórsetti. Onyń ishinde úsh iri joba boıynsha munaı óndirý kólemi 27 mıllıonnan astam tonnany qurady. Qashaǵanda 6,2 mln, Teńizde 14,7 mln jáne Qarashyǵanaqta 6,3 mln tonna munaı óndirildi. Munaı eksportynyń kólemi 36,5 mln tonnany qurady. Bul byltyrǵy sáıkes kezeńmen salystyrǵanda shamamen 6 paıyzǵa kóp», - dedi mınıstr.

Onyń dereginshe, munaı óńdeý kólemi 7,7 mln tonnany quraǵan. Bul byltyrǵy sáıkes kezeńmen salystyrǵanda 5 paıyzǵa kóp. Elimizdegi úsh munaı óńdeý zaýyty 5,5 mln tonnaǵa jýyq munaı ónimderin shyǵaryp, ótken jylmen salystyrǵanda 1,5 paıyz ósim kórsetti.

«Birinshi jartyjyldyqta munaı ónimderiniń ishki naryǵy turaqty jáne janar-jaǵarmaı tapshylyǵy bolǵan joq. Qazirgi ýaqytqa deıin ishki naryq qajet etetin janar-jaǵarmaı qaldyqtarynyń bir aılyq qory saqtalýda. 9 shildedegi jaǵdaı boıynsha 361  myń tonna benzın, 246 myń tonna dızel otyny bar»,-  dedi Qanat Bozymbaev.