I.Tasmaǵambetov mektep baǵdarlamasyna esse jazý tapsyrmasyn engizýdi usyndy

«Bilim berýdiń osy ámbebap ádisi balalardy óz betimen oılaýǵa úıretedi», - deıdi ol.

Qala ákimi atap kórsetkendeı, búginde bilim berý mekemeleriniń basym bóligi áli kúnge deıin keńestik júıeden bas tarta almaı keledi. «Biraq ýaqyt bilim berý salasyna biraz ózgeristerdi engizýdi talap etip otyr. Búginde damyǵan ekonomıkalar, eń aldymen, zııatkerlik resýrstardyń joǵary áleýetine negizdeledi. Sol sebepti búgingi bilim berý júıesi balany ózgeniń oı-ıdeıalaryn jattaýǵa emes, óz betimen oılaýǵa úıretýi tıis», - dedi I.Tasmaǵambetov. Osyǵan baılanysty qala ákimi Qazaqstandaǵy dástúrli júıe men Batystyń ádistemesin salystyryp, bilim berýdiń ozyq úlgilerin anyqtady. «Balanyń oılaý qabiletin damytatyn osyndaı ámbebap ádistemelerdiń biri - esse. Bizdiń jattandy shyǵarmalarymyzǵa qaraǵanda, esse balany óz betimen oılaýǵa úıretedi. Ol boıynsha beriletin taqyryptar san alýan ári ózekti bolyp keledi. Bizde bolsa, shyǵarmalardyń taqyryby sońǵy 20 jylda birde-bir ret ózgermegen. Olar sonaý XX ǵasyrdyń 60-70 jyldardan beri kele jatyr», - deıdi Astana qalasynyń ákimi. I.Tasmaǵambetov Batys elderinde tarıh páni boıynsha jazylatyn esseni de mysal retinde keltirdi. Ol jaqta oqýshylarǵa «Árbir azamattyń el alyndaǵy mindeti qandaı?» degen taqyryp beriledi. Osylaısha, balalar mektep jasynan bastap adamnyń azamattyq boryshy pen el aldyndaǵy mindeti tóńireginde oı qozǵap, patrıot bolyp qalyptasady. Osy oraıda qala ákimi O.Súleımenovtyń «AzııA» shyǵarmasy aıasynda erkin oı qozǵap, esse jazýdy usyndy.