I. Tasmaǵambetov kásipkerlerge ákimshilik kedergilerdi azaıtýda qol ushyn bermek
ASTANA. 29 qazan. QazAqparat - 28-shi qazanda ótken Kásipkerler palatasy Astana qalalyq keńesiniń birinshi otyrysynda qala ákimi Imanǵalı Tasmaǵambetov bıznesmenderdiń kúrdeli máselelerin sheshýge jeke ózi atsalysatynyn aıtty.
«Bizge kóptegen máselelerdi sheshý kerek. Qalada bıznestiń qarqyndy damýy biz úshin óte mańyzdy. Meniń taldaýym boıynsha, dúkenge jeke kirer esik salý úshin jer telimin bólý jáne páterdi dúkenge arnap qaıta jobalaýǵa 515 jumys kúni ketetinin ańǵardym. Mundaı máselelerdi bir apta ishinde sheshý jaǵdaılaryn qarastyrýǵa bolady. Azamattardyń ruqsat alyp, ári qaraı jumysty bastaýyn uıymdastyrýǵa daıynmyn», - dedi qala basshysy.
I. Tasmaǵambetov óz sózinde shaǵyn jáne orta bıznes qalanyń jalpy óniminiń 80% quraǵanyn qalaıtynyn atap ótti.
Ulttyq kásipkerler palatasy Prezıdıýmynyń tóraǵasy Tımýr Qulybaev Astana bıznesmenderi bılikpen sapaly dıalog jasaýy kerek ekendigin atap ótti.
Tımýr Qulybaev Kásipkerler palatasynyń Astana qalasyndaǵy Óńirlik keńesi múshelerine arnap: «Ulttyq kásipkerler palatasy Astanada ornalasqan, sondyqtan sizderdiń osy jerde jumys jasaýǵa jaqsy ustanymdaryńyz bar. Óńirlik palatanyń negizgi mindeti bılikpen syndarly dıalog jasaý. Bul eń aldymen ákimdik, úkimet, basqa da memlekettik organdar», - dedi. Bul týraly QR UKP baspasóz qyzmetinen habarlady.
